Պանդեմիային հաջորդած տնտեսական ճգնաժամը վատագույնն է դարձել վերջին հարյուրամյակի ընթացքում։ Այս մասին հայտարարել է ՄԱԿ-ի գլխավոր քարտուղար Անտոնիու Գուտերեշը՝ «Դավոսյան օրակարգը»  միջոցառման ժամանակ,  տեսակապով ելույթ ունենալով ։

«Ավելի քան 2 մլն մարդ մահացել է, և մենք գտնվում ենք 100 տարվա ընթացքում վատագույն տնտեսական ճգնաժամի մեջ»,- ասել է նա:

Ընդ որում, Գուտերեշը վստահություն է հայտնել, որ 2021 թվականին աշխարհը եզակի հնարավորություն ունի՝ COVID-19 պանդեմիայից վերականգնվելիս փխրունությունից անցում կատարի կայունության: Դրա համար, ըստ գլխավոր քարտուղարի, անհրաժեշտ է, որ կառավարությունները, միջազգային կազմակերպությունները, մասնավոր հատվածը և քաղաքացիական հանրությունը համատեղ աշխատեն:

«Մեր ընդհանուր ուղղությունը պետք է լինի կայուն զարգացման նպատակներին հասնելը»,- նշել է նա:

ՄԱԿ-ի ղեկավարը նաև հիշեցրել է նոր սոցիալական պայմանագրի և նոր գլոբալ պայմանագրի իր նախաձեռնության մասին, որոնք թույլ կտան բոլորի համար հավասար հնարավորություններ ստեղծել համընդհանուր իրավունքների և ազատությունների ապահովման գործում:

Գուտերեշը նաև նախազգուշացրել է աշխարհի՝ երկու մասի փլուզման հնարավորության մասին՝ երկու տնտեսությունների ՝ Չինաստանի և ԱՄՆ-ի գլխավորությամբ:

«Ինձ շարունակում է վախեցնել հսկայական ճեղքման հնարավորությունը. աշխարհը բաժանվում է երկու մասի՝ երկրագնդի երկու մեծագույն տնտեսությունների գլխավորությամբ, երկու տարբեր գերիշխող արժույթներով, առևտրի սեփական կանոններով, սեփական համացանցով, սեփական աշխարհաքաղաքական և ռազմավարություններով: Մենք պետք է անենք հնարավոր ամեն ինչ, որպեսզի կանխենք նման բաժանումը», – ասել է նա:

ՄԱԿ-ի «Համաշխարհային տնտեսական վիճակը և հեռանկարները» զեկույցի համաձայն ՝ 2020 թվականին համաշխարհային տնտեսությունը կրճատվել է 4,3 տոկոսով, ինչն ավելի քան երկուսուկես անգամ ավելի է, քան 2009 թվականի համաշխարհային ֆինանսական ճգնաժամի ժամանակ: