Տարածքային կառավարման համակարգում նախատեսվում են փոփոխություններ, դրա անհրաժեշտությունը կա, սակայն նախորդ տարվանից ծրագրված մարզպետարանների օպտիմալացման գործընթացը՝ երկրում ստեղծված իրավիճակով պայմանավորված, հետաձգվում է։ Այս մասին այսօր Գյումրիում լրագրողների հետ ունեցած ճեպազրույցի ընթացքում հայտնել է ՀՀ տարածքային կառավարման և ենթակառուցվածքների նախարար Սուրեն Պապիկյանը։

«Ամեն ինչ պատրաստ է դեռևս գարնանից, բայց համավարակն ու հետո էլ պատերազմը խանգարեցին փոփոխության ընթացքին։ Այդ փոփոխությունները ենթադրում են  նաև կրճատումներ։ Ես հիմա այս պահին ուղղակի ճիշտ չեմ համարում, որ մենք այսօր գնանք այդ քայլին։ Որ գնալու ենք այդ քայլին, դա միանշանակ է, երկրորդ կարծիք չկա, բայց ժամանակը պիտի պատեհ լինի, հիմա պատեհ ժամանակը չի»,- նշել է նախարարը։

Համայնքների խոշորացումը ևս հետաձգված ծրագրերից է։ Ռազմական դրությամբ պայմանավորված, համայնքների բնակիչների հետ հանդիպումներ ու հանրային լսումներ չեն եղել։ Հավանաբար, խոշորացման ծրագիրը կսկսվի աշնանը՝ սպասվող ՏԻՄ ընտրություններին զուգահեռ։ Իսկ կառավարության հրաժարականը պահանջող Շիրակի մարզի  համայնքապետները սև ցուցակում չեն հայտնվել , նրանց նկատմամբ հետապնդումներ չեն եղել։ Լրագրողների հետ զրույցում  հավաստիացրեց նախարարը։

«Մենք նման ցուցակ չունենք, չենք էլ ունեցել։ Կարծում եմ՝ հանրությունն է որոշողը, թե որ համայնքապետը որ ցուցակում կհայտնվի, ու հանրությանը այդ հնարավորությունը կտրվի»,- ասել է  նախարարը։