44-օրյա պատերազմից  հետո, հրադադարի հաստատումից մեկ ամիս անց Խծաբերդ գյուղի դիրքերում գերեվարված  Շիրակից 62 տղաների  հայրենիք վերադարձի հարցին է անդրադարձել ՀՀ տարածքային կառավարման և ենթակառուցվածքների նախարար Սուրեն Պապիկյանը։ Նա նշեց, որ շիրակցի 62 գերիների կյանքին ու առողջությանը սպառնալիք չկա և նման հայտարարություն անելու համար հիմք է հանդիսանում  այն, որ  նրանց՝ Ադրբեջանում լինելու փաստը հաստատել է Կարմիր խաչը։

«Անձամբ ես այսօր ցանկություն եմ հայտնել հարազատների հետ հանդիպել, երեկ որոշակի մանրամասներ, բնականաբար, ճշտել եմ պատկան մարմինների ներկայացուցիչներից, որպեսզի  կարողանամ մարդկանց ներկայացնել առկա իրավիճակը։ Մի բան հստակ է՝ վերջին տեղեկությունները, որ ամփոփվել են՝ մեր 62 եղբայրների այնտեղ լինելը հաստատված է նաև Կարմիր խաչի գրասենյակով, երաշխավորում են նրանց անվտանգությունը, որ որևէ մեկի կյանքի և առողջության հետ որևէ սպառնալիք լինել չի կարող, հիմա պիտի աշխատենք նրանց վերադարձի ուղղությամբ, ինչը հիմա մեր գործընկերները ամենօրյա ռեժիմով կատարում են»,- հայտնեց  նախարարը։

Նախարարը տեղում գերեվարվածների ծնողների ու հարազատների հետ հանդիպելու ցանկություն էր հայտնել։ Նրանք  սպասում էին մարզպետարանի  մուտքի մոտ։ Նորանշանակ մարզպետին Շիրակի մարզպետարանի աշխատակազմին ներկայացնելուց հետո, նախատեսված էր նախարարի հանդիպումը  գերեվարվածների ծնողների և հարազատների հետ։