Օքսֆորդի համալսարանի և AstraZeneca ընկերության կողմից համատեղ մշակված պատվաստանյութը կարող է Եվրոպայում կիրառվել միայն երիտասարդների շրջանում, քանի որ չկան բավարար տվյալներ այն մասին, թե որքանով է այն արդյունավետ 65 տարեկանից բարձր անձանց շրջանում։

The Guardian պարբերականի փոխանցմամբ՝ այս մասին հայտնել է դեղամիջոցների կարգավորման հարցերով եվրոպական գործակալությունը, որը AstraZeneca-ի պատվաստանյութի օգտագործումը կհաստատի այս շաբաթվա վերջին՝ մեկ ամիս անց այն բանից հետո, ինչ պատվաստանյութը հաստատվել է Մեծ Բրիտանիայում։

Պարբերականը փոխանցում է, որ La Repubblica-ին տված հարցազրույցում AstraZeneca-ի գործադիր տնօրեն Պասկալ Սորիոն ընդունել է, որ սահմանափակ քանակությամբ տվյալներ կան տարեցների շրջանում պատվաստանյութի արդյունավետության վերաբերյալ։ Նա միևնույն ժամանակ պնդել է, որ առկա տեղեկությունները ցույց են տվել, որ տարեցների մոտ կորոնավիրուսի դեմ նույնքան ուժեղ հակամարմիններ են առաջացել, որքան երիտասարդների մոտ։

Սորիոն միևնույն ժամանակ նշել է, որ ըմբռնումով կմոտենա, եթե որոշ երկրներ, զգուշությունից ելնելով, իրենց պատվաստանյութն օգտագործեն միայն երիտասարդների համար։

«Բոլորի համար բավականաչափ թվով պատվաստանյութեր չկան, ուստի եթե նրանք ուզում են տարեցների համար օգտագործել այլ պատվաստանյութ, իսկ մեր պատվաստանյութն օգտագործել երիտասարդների համար, ի՞նչ խնդիր կա։ Դա խնդիր չէ», – ասել է ընկերության տնօրենը։

Նշենք, որ AstraZeneca-ի պատվաստանյութը Մեծ Բրիտանիայում կիրառվում է 70 տարեկանից բարձր անձանց շրջանում։