Ցավ, ցավ եւ նորից ցավ։ Այս մասին այսօր՝ հունվարի 28-ին, Եռաբլուր զինվորական պանթեոնում, NEWS.am-ի հետ զրույցում, ասել է ԲՀԿ պատգամավոր Արման Աբովյանը՝ պատասխանելով հարցին, թե ինչ է զգում Եռաբլուր այցելելով։

«Ցավ՝ մեր բոլոր եղբայրների, քույրերի համար, որոնց մահը, որոնց պայքարը, որոնց կռիվը այս իշխանությունը փորձեց իմաստազրկել, բայց դա նրանց չի հաջողվելու։ Չեմ հասկանում՝ ի՞նչ զգացումներով են ապրում իշխանությունը, Փաշինյանը։ Ինչո՞վ են իրենք ապրում։ Միայն մի բան կարող եմ ասել․ անելու ենք ամեն ինչ, որպեսզի ամեն ինչ իր տեղն ընկնի, տղերքի մահը չլինի անիմաստ», ասել է Արման Աբովյանը։

Իշխանություններն, ըստ Աբովյանի, երկիրը տանուլ են տվել եւ հիմա անհասկանալի շարժերի մեջ են։

«Արտահերթ ընտրություններով ուզում են վերարտադրվել, նույնիսկ չեմ ցանկանում քննարկել իշխանության քայլերը», ասել է ԲՀԿ-ական պատգամավորը։

ԲՀԿ խմբակցության մեկ այլ անդամ՝ Իվետա Տոնոյանը նշել է, որ իշխանությունները մեզանից խլել են հունվարի 28-ի տոնը։

«Մենք ամեն ինչ պետք է անենք, որպեսզի 21-րդ դարին համահունչ, բարձր տեխնոլոգիական հագեցվածությամբ, հաղթանակող բանակ ունենանք։ Մենք մեր բանակը պարտված չենք համարում, այս պարտությունը իշխանության ապաշնորհ քաղաքականության հետեւանք է։ Մի ամբողջ սերնդի գենետիկ ողնաշար կոտրվեց, խորհրդանշական այս օրը մենք պետք է խոստանանք հետ բերել մեզանից խլված հաղթանակը», նշել է Իվետա Տոնոյանը։

ԱԺ ինքնալուծարման եւ իշխող խմբակցության մյուս նախաձեռնությունների առնչությամբ, Ի․Տոնոյանն ասել է, որ իշխանությունը ամեն գնով պահելու գործելաոճը դատապարտված է ձախողման։