Այս այցը լավ առիթ է, որ մեր համապատասխան գերատեսչությունում ճշգրտումներն անեն, թե ինչպիսի հռետորաբանություն է պետք Իրանի հետ հարաբերություններում: Այս մասին Tert.am-ի հետ զրույցում ասաց իրանագետ Ահարոն Վարդանյանը՝ անդրադառնալով ԻԻՀ արտաքին գործերի նախարար Մոհամմադ Ջավադ Զարիֆի տարածաշրջանային այցին:

 Իրանագետը նշեց, որ Իրանի ԱԳ նախարարը մի քանի հայտարարություններ է արել, որոնց շուրջ կարելի է կենտրոնանալ:  «Նա անդրադարձ կատարեց Իրանի կարմիր գծերից մեկին` Հայաստանի տարածքային ամբողջականությանը, որը հենց այնպես չէր: Դա վերաբերում էր այն բանին, որ Իրանում տեսնում են որոշակի վտանգ, և շատ կարևոր մեսիջ էր թուրք-ահաբեկչական խմբավորմանը»,-ասաց նա և նշեց, որ դաշտ հստակ մեսիջ էր, որ Հայաստանի տարածքային ամբողջականության դեմ ոտնձգությունների դեպքում Իրանը ձեռքերը ծալած չի նստի և ինչ-որ գործողությունների կարող է դիմել: Չնայած դրան՝ Ահարոն Վարդանյանն ասաց, որ մյուս կողմից վատ է, որ քննարկվում է Հայաստանի տարածքային ամբողջականությունը, սակայն ունենք այն, ինչ ունենք:

«Դա նաև «Մեղրու միջանց կոչվածին» է առնչվում, Իրանում հասկանում են, որ սա ինչ-որ առումով կարող է վտանգել հայ-իրանական սահմանը և տարածքային ամբողջականությունը: Ոչ պակաս կարևոր է ահաբեկիչների թեմային անդրադառնալը, որովհետև եթե նայենք, ապա նոյեմբերի 10-ից հետո կարծեք այս թեման կորավ ընդհանուր լրատվամիջոցներից` ինչպես հայկական, այնպես էլ միջազգային: ԱԳ նախարարը սա ևս բերեց դաշտ, քանի որ հասկանում են՝ կա այդ խնդիրը, և որքան դա Հայաստանի համար է վտանգավոր, այնքան էլ Իրանի համար, իսկ Իրանը պայքարում է ահաբեկչության դեմ»,-ասաց նա:

Ահարոն Վարդանյանը հաջորդ կարևոր մեսիջը համարեց հումանիտար հարցը, ինչի առումով Իրանը պատրաստակամ է աջակցել:

«Ամփոփելով ասեմ, որ հայ-իրանական օրակարգում նոր թեմաներ առաջարկվեցին, դաշտ նետվեցին, որոնց շուրջ պետք է աշխատել: Չգիտեմ Հայաստանի կողմից ինչ առաջարկներ են ներկայացվել, սակայն Հայաստանի քաղաքականությունը Իրանի նկատմամբ բավարար չէ և բավականաչափ աշխատանքներ չեն տարվում: Իրանի հետ հարաբերությունները արդեն երեք տարի է սպասողական վիճակում է և կարելի է այս այցը օգտագործել և թարմացնել և ակտիվացնել այդ հարաբերությունները և այս այցը լավ հնարավորություն է նոր դինամիկա, նոր շունչ հաղորդելու դրանց»,-ասաց նա:

Ինչ վերաբերում է  Իրանի շնորհավորանքին Ադրբեջանին հաղթանակի առիթով, իրանագետն ասաց՝ չպետք է շատ կենտրոնանալ այդ հայտարարության վրա: