Իրանը Ռուսաստանի հետ համաձայնագիր է ստորագրել «Սպուտնիկ V» ռուսական հակակորոնավիրուսային պատվաստանյութի հարցով համագործակցության, այդ թվում՝ Իրանում դրա արտադրության վերաբերյալ: Այս մասին հայտնում է IRNA լրատվական գործակալությունը՝ Մոսկվայում Իրանի դեսպան Քազեմ Ջալալիի խոսքերին հղումով:

«Իրանում ռուսական պատվաստանյութը գրանցելուց հետո ուրբաթ օրը Իրանի և Ռուսաստանի միջև ստորագրվել է գնման և համատեղ արտադրության պայմանագիր»,- ասել է դեսպանը:

Նա նշել է, որ պայմանագրի հիման վրա պատվաստանյութի առաջին խմբաքանակը երկիր կուղարկվի փետրվարի 4-ին, իսկ երկրորդը՝ մինչև փետրվարի 28-ը և ընթացիկ իրանական տարվա ավարտը:

Անդրադառնալով պատվաստանյութի անվտանգության թեմային՝ Ջալալին մանրամասնել է, որ «Սպուտնիկ V»-ն այժմ փորձարկվում է ամբողջ Ռուսաստանի տարածքում, իսկ մինչ այժմ դրանով պատվատվել են ՌԴ պաշտպանության նախարարը, զինված ուժերի ներկայացուցիչները, բժշկական անձնակազմը և ուսուցիչները:

Դեսպանի խոսքով՝ մինչ այժմ Ռուսաստանում պատվաստվել է շուրջ երեք միլիոն մարդ, և դրա կողմնակի ազդեցությունների մասին դեռևս տեղեկություններ չեն հաղորդվում:

Հիշեցնենք՝ Թուրքիան, ԱՄԷ-ն, Հնդկաստանը, Հունգարիան և Հարավային Կորեան պայմանագիր են ստորագրել Ռուսաստանի հետ պատվաստումների և համատեղ արտադրության վերաբերյալ:

Ավելի վաղ Իրանի արտաքին գործերի նախարար Մոհամադ Ջավադ Զարիֆը հայտարարել էր, որ Իրանը հաստատել է ռուսական հակակորոնավիրուսային պատվաստանյութի օգտագործումը: Նա ավելացրել էր, որ «Սպուտնիկ V»-ը գրանցվել և հաստատվել է նաև Իրանի առողջապահական մարմինների կողմից:

Ինչպես ավելի վաղ հայտնել էր Tert.am-ը, «Սպուտնիկ V» պատվաստանյութը մշակվել է Ռուսաստանի ուղղակի ներդրումների ֆոնդի (ներդրումային նախագծերը ֆինանսավորող պետական կազմակերպություն) հետ համատեղ և գրանցվել է 2020-ի օգոստոսին: