Եվրաբոնդերի պարտքը մեր տնտեսության վրա վատ հետևանքներ կարող է ունենալ, հատկապես, երբ ծրագրավորված չէ, թե ինչ են անելու. Tert.am-ի հետ զրույցում նշեց տնտեսագետ Կարեն Ադոնցը՝ անդրադառնալով Կառավարության՝ 750 մլն ԱՄՆ դոլարի ընդհանուր արժողությամբ եվրաբոնդերի թողարկմանը:

«Մեր բյուջեի հարկային մուտքերը կազմում են 3.2 մլրդ, եթե վերցնում եք 750 մլն դոլար, ենթադրում եմ, որ էլի կվերցնեն, կհասցնեք 1 մլրդ-ի կամ 1 մլրդ 100 կամ 200 մլն դոլարի չափ, դա նշանակում է, ամեն տարի վերցնում եք մոտ 30 տոկոս մեր բյուջեի հարկային մուտքերի չափով պարտք, իսկ դրանից մեր տնտեսությունը իրապես չի փոխվելու»,- ասաց նա:

Տնտեսագետի խոսքով՝ պարտքի դիմաց ամեն տարի բյուջեի 30 տոկոսի չափով պիտի վճարվի մայր գումար, սակայն դա մեր տնտեսության համար մեծ բեռ է լինելու.

«Ինպե՞ս են վճարելու, կրճատելո՞ւ են թոշակառուների վճարումները, սոցիալական ծախսերը: Ի՞նչ են տալու այդ պարտքերի դիմաց, մեր երկիրը ի վիճակի չէ 9-10 մլրդ դոլար վճարել, եթե ունի 3,2 մլրդ դոլարի բյուջե, ի՞նչ են տալու դրա դիմաց, հողե՞ր եք տալու: Մի օր գալու են ասեն՝ վճարեք այդ գումարը կամ տվեք մեզ արտաքին կառավարման, որովհետև դուք ընդունակ չեք ձեր պարտքը վճարել , ի՞նչ են տալու, երկրի կառավարո՞ւմը, թե՞ տալու են Մեղրիի միջանցքը, ի՞նչ են փոխարենը վճարելու, իսկ մենք այլ տարբերակ չենք պատկերացնում»:

Ադոնցի խոսքով՝ տնտեսական աճի բացակայությունը կապված է նաև տնտեսական քաղաքականության մասին պատկերացման բացակայությունից: Նրա խոսքով՝ պատերազմից հետո առաջացել են բանակի սպառազինության և սոցիալական խնդիրների հսկայական ծախսեր և այդ ամենը վերականգնելու համար ստիպված են լինելու կրկին պարտքեր կուտակելու, որն էլ մեծ խնդիր է առաջացնելու. «Նույնիսկ չգիտենք, թե այդ պարտքի հետևում ով է կանգնած, ինչի՞ են ձեզ եվրաբոնդեր վաճառել, երբ մեր երկիրն այս վիճակում է, ինչի՞ են մեզ այդքան հեշտ պարտք տալիս՝ զարգացման հեռանկար ունե՞նք, ենթակառուցվածքներ ունե՞նք, ի՞նչ ունենք»:

Կարեն Ադոնցը նշում է, որ Կառավարությանը ներկայացրել է տնտեսական զարգացման իր ծրագիրը, սակայն արձագանք չի ստացել: Նա համոզված է, որ տնտեսական քաղաքականությունն էապես փոփոխման կարիք ունի, պետք է նաև կարողանալ համախմբել դրսի ներուժը, միասնական տնտեսական համակարգ ստեղծել՝ ծանր իրավիճակից դուրս գալու համար.

«Ներկայացված ծրագիրը հնարավորություն կտար ներքին ռեսուրսներով ու դրսի հնարավորություններով բացել շուկաներ և կապվել այդ շուկաների հետ ու ակտիվացնել շուկաները: Սփյուռքահայերն ունեն պահանջարկ, այն պետք է համախմբել համապատասխան համակարգով և կապել մեր տնտեսությանը, ստեղծել ամբողջական արտադրություն, շուկա: Պետք է մեր լայն սպառման արտադրողերին կապվել սփյուռքի հետ, ստեղծել ամբողջական ֆինանսաարդյունաբերական խումբ, բայց բաժնետիրական ընկերության կարգավիճակ տալ՝  դարձնելով իրենց բաժնետեր, ամբողջ համակարգը տեղից շարժելու համար»: