Աբովյան քաղաքի Խաչատուր Աբովյանի անվան թիվ 1 ավագ դպրոցի նախկին տնօրեն Մետաքսյա Բաբայանը, փոխտնօրեն Արմեն Ավագյանը և ուսուցիչներն այսօր Ոստիկանության Կոտայքի բաժին են հրավիրվել՝ նորանշանակ տնօրեն Քարմելա Առաքելյանի ցուցումով:

Այս մասին այսօր Tert.am-ը տեղեկացավ դպրոցի պատմության ուսուցիչ Հայկ Փայտյանից, վերջինիս պնդմամբ՝ ամբողջ ուսուցչական կազմը վստահ է, որ նորանշանակ տնօրենը Կոտայքի նախկին մարզպետ, շրջակա միջավայրի նախարար Ռոմանոս Պետրոսյանի հովանավորության ներքո է գտնվում և սա է պատճառը, որ այսօր դպրոցն անօրինությունների է ականատես լինում:

Փայտյանը ներկայացրեց, որ ամբողջ խժդժությունը սկսվել է հունվարի 22-ին տեղի ունեցած տնօրենի ընտրություններից հետո, որտեղ խորհրդի ձայները բաժանվել են 4-4 հարաբերակցությամբ և արդեն դպրոցի տնօրենի ընտրելու հարցով պետք է զբաղվեր ԿԳՄՍ նախարարը: Նա նշեց, որ տնօրենին ընտրող կառավարման խորհուրդը բաղկացած է 8 անդամից՝ 2-ը մանկավարժական կոլեկտիվի ներկայացուցիչներ, 2-ը՝ ծնողական խորհրդի, ավագ դպրոցների պարագայում 3-ը՝ ԿԳՄՍ ներկայացուցիչներ և մեկը՝ մարզպետարանից:

«Որևէ հստակ պատճառ չկա, թե ինչու են նրան ընդհանրապես ձայն տվել, բացի նրանից, որ դա պատվեր է եղել»,- ասաց նա և հիշեցրեց, որ դպրոցի անձնակազմը դիմում էր ներկայացրել ԿԳՄՍՆ՝ սպասելով, որ նախարարությունը կկարևորի աշխատակազմի խոսքը և կկատարի ճիշտ ընտրություն՝ պաշտոնին թողնելով նախկին տնօրենին:

Ի վերջո, նախարարն ընտրել է Քարմելա Առաքելյանին, որն ուսուցչի գնահատմամբ անհասկանալի է, քանի որ որոշման մեջ աբսուրդ բաներ են գրված, ինչպես օրինակ՝ Քամելա Առաքելյանն ավարտել է ԵՊՄՀ-ը, 1994 թվականից հետո ունի մանկավարժական փորձ, ներկայացրել է ծրագիր, մինչդեռ պատմության ուսուցչի խոսքով՝ նախկին տնօրենն ավարտել՝ ԵՊՀ-ն, 1991 թվականից մանկավարժական փորձ ունի և ըստ նրա, առաջ բերված պատճառները որևէ կերպ չեն արդարացվում: Եվ վերջինիս պնդմամբ՝ անգամ պետք է երկուսի ներկայացրած ծրագրերը դնել և համեմատել, որպեսզի ամեն ինչ պարզ լինի:

«Այդպես չեն անում, իրենց հովանավորյալին պետք չէ բերել, իրենց մարդկանց էլ խորհրդի կազմ մտցնել, ընտրություն անցկացնել: Խնդիրն այն է, որ ամբողջ Կոտայքի մարզում նույն վիճակն է, արդեն մի քանի դպրոցներ նույն պատկերն են ունեցել դպրոցի տնօրենի ընտրության հարցում, նույն ձեռագիրն է ամբողջությամբ: Խորհրդի անդամներից մեկը Ռոմանոս Պետրոսյանի կինն է՝ Արմինե Պետրոսյանը, ով ընդգրկված է Աբովյան քաղաքի թիվ 2, 7, 10 հիմնական և թիվ 4 ավագ դպրոցների կառավարման խորհուրդներում»,- ասաց  Փայտյանը:

Ներկայացնելով կառավարման խորհրդի մնացած անդամներին՝ Փայտյանը նշեց նաև, թե նրանցից ովքեր ինչ կապ ունեն նախկին մարզպետի հետ: Օրինակ՝ մարզպետի պաշտոնում իր նախկին օգնական Անի Չիլինգարյանն է, ով ընդգրկած է Աբովյանի թիվ 1 ավագ և թիվ 7 հիմնական դպրոցների կառավարման խորհուրդներում: Մայրանուշ Նավոյանը, ով Ռոմանոս Պետրոսյանի եղբոր կինն է, վերջինս էլ  ընդգրկված է Աբովյանի թիվ 1, թիվ 4 , թիվ 6 ավագ դպրոցների կառավարման խորհուրդներում:

«Ռոմանոսի քենի Անի Հակոբյանը, ով ևս ընդգրկված է Աբովյանի թիվ 1, 4 և 6 ավագ դպրոցների կառավարման խորհուրդներում: Նույն դպրոցների կառավարման խորհուրդների կազմում է նաև Մելինե Գասպարյանը, ով Կոտայքի մարզպետարանում է աշխատում և Ռոմանոսի կադրերից է: Լավ, սա ի՞նչ է, եթե ոչ միտումնավոր նշանակումներ՝ քաղաքական դրդապատճառներով»,- մեկնաբանեց նա:

Փայտյանը ներկայացրեց նաև այն ծանուցումը, որի համաձայն նրան, դպրոցի նախկին տնօրենին և ուսուցչական կազմին հրավիրել են Ոստիկանության բաժին, որը եղել է նորանշանակ տնօրենի հաղորդման համաձայն: Նա նշեց, որ վերջինս հրաժարվել է ցուցմունք տալ, սակայն մնացած ուսուցիչներին ներկայացրել են, որ բաժին են հրավիրվել մի քանի տարբեր պատճառներով, օրինակ՝ նախարարի որոշման խոչընդոտում:

«Բնականաբար, նման բան չի եղել, մենք պարզապես այսօր հրավիրում էինք նախարարությունից ներկայացուցիչների, որպեսզի մեկնաբանեին, թե ինչ է նշանակում իրենց որոշումը: Որևէ բացատրություն չեն տվել, տպավորություն է, թե չենք ուզում, մեկ է՝ էլի պետք է համաձայնենք, որովհետև 60 հազար աշխատավարձ ենք ստանում»,-շեշտեց նա և հավելեց, որ այսօր ուսուցիչները դասապատրաստում չեն իրականացրել և չեն պատրաստվում Առաքելյանի հետ աշխատել նույն դպրոցում, իսկ աշակերտներն իրենց կամքով այսօր դպրոց չեն գնացել: