Ազգային անվտանգության ծառայությունը օրեր առաջ հայտնել էր, որ հետամուտ լինելով հանցավորության դեմ ուղղված պայքարի` օրենքով իրեն վերապահված գործառույթների անշեղ կատարմանը, իրականացված մեծածավալ քննչական և դատավարական գործողությունների, ինչպես նաև համալիր օպերատիվ-հետախուզական միջոցառումների արդյունքում պարզել է, որ ՀՀ-ում գործունեություն ծավալող ընկերության անվամբ Արաբական Միացյալ Էմիրություններից «ներքին սպառման համար բացթողում» մաքսային ընթացակարգով ՀՀ է ներմուծվել և հայտարարագրվել է 148.535 ԱՄՆ դոլար հաշիվ ապրանքագրային արժեքով 1776.84 մետր կարատ քաշով մշակված ադամանդ, որի մաքսային արժեքը կազմել է 72.014.112 ՀՀ դրամ, այնինչ նյութերի նախապատրաստմամբ պարզվել է, որ ընկերության կողմից վերոգրյալ հայտարարագրով ՀՀ ներմուծված և փորձագետի կողմից 18.09.2020 թվականի դրությամբ հետազոտված ադամանդների շուկայական արժեքն ավելին է, քան 420.000.000 ՀՀ դրամը, որի արդյունքում պետությանը պակաս է հաշվարկվել և վճարվել առանձապես խոշոր չափերի հասնող մաքսային վճարներ: ԱԱԾ հաղորդագրության համաձայն Էկոնոմիկայի նախարարության պաշտոնյան ձերբակալվել է։

Irakanum.am-ը ԱԱԾ լրատվական ծառայությունից փորձեց ճշտել, թե հաղորդագրության մեջ հիշատակված տնտեսվարող ընկերության փաստացի սեփականատերերի նկատմամբ, որպես խափանման միջոց ընտրվել է կալանավորումը։ «Մեղադրյալի դատավարական կարգավիճակ կալանք՝ խափանման միջոցով»,- ասացին ԱԱԾ լրատվական ծառայությունից։

Նշենք, որ լրատվամիջոցների հրապարակումների համաձայն խոսքը Աբովյանում գործող ադամանդի գործարանի սեփականատերերի մասին է։ Նրանք Արմեն և Արտակ Բաղիկյաններն են, որոնք մտերիմ հարաբերություններ ունեն գործարար Խաչատուր Սուքիասյանի հետ։ Հրապարակումների համաձայն, հենց Սուքիասյանն է ժամանակին միջնորդել, որպեսզի Բաղիկյան եղբայրները ծանոթանան Նիկոլ Փաշինյանի հետ և վերջինիս հրավիրեն իրենց գործարանի բացմանը։