Կա հավանականություն, որ «Լուսավոր Հայաստանն» ու «Բարգավաճ Հայաստանը» կբոյկոտեն ընտրությունները, դա կանեն նաև ՀՀԿ-ն ու ՀՅԴ-ն, ինչպես նաև քիչ թե շատ հենք ունեցող ուժերը, հետևաբար այդ ընտրություններն անիմաստ կլինեն: Մենք գնանք, նորից մենք ընտրվե՞նք: Այս մասին լրագրողների հետ զրույցում հայտարարել է իմքայլական պատգամավոր Հովիկ Աղազարյանը:

Հարցին՝ չեն ուզո՞ւմ ընտրվել, Աղազարյանն ասել է, որ ինքն այն տեսակետին է, որ ինքը՝ որպես պատգամավոր, պայմանական ասված, պետք է ամեն ինչ անի, որ հաջորդ անգամ ժողովուրդն իրեն չընտրի. «Որովհետև ես չեմ կարող անել լավ բաներ, որ ժողովուրդն ինձ սիրի: Ես պետք է անեմ այնպիսի բաներ, որոնք այսօր կցավեցնի ժողովրդին, սակայն վաղը դա կտա իր դրական արդյունքը:

Այս պահի համար դա անընդունելի կլինի, իսկ վաղը կտա իր արդյունքը: Հետևաբար ես կարող է իմ պահվածքով այնպիսին լինեմ, որ ժողովուրդն ինձ չընտրի: Բոլորն էլ ուզում են ընտրվել, սակայն դա չպետք է լինի ինքնանպատակ: Եթե պետք է պուպուշ պահել ընտրվելու համար, ուրեմն ոչ մի հարց չի լուծվելու»: