Իշխանությունն արեց հետաքրքիր, մանիպուլատիվ քայլ, որը հաջողությամբ ավարտին է հասցնում, ամբողջ դաշտը մանիպուլացված է կեղծ օրակարգերով: Այս մասին ԱԺ-ում լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով իշխանությունների կողմից արտահերթ ընտրությունների չգնալու որոշման մասին հայտարարությանը:

«Ընդդիմադիր դաշտում նոյեմբերի 10-ից եղել է մի պահանջ ՝վարչապետը պետք է հրաժարական տա, խորհրդարանն ընտրի նոր վարչապետ, ձևավորվել էր կոնսենսուս-1: Ի պատասխան այս հայտարարությունների, ձևավորված հանրային ակնկալիքների և պահանջարկի վարչապետը հայտարարում է,՝ «ես առաջարկում եմ ձեզ անել ընտրություններ»: Եվ սկսում է արտահերթ ընտրությունների վերաբերյալ «նիսյա» խոսակցություն»,-ասաց նա:

Էդմոն Մարուքյանը հիշեցրեց, որ Նիկոլ Փաշինյանը նաև արտահերթ ընտրությունների համար նախապայման էր առաջարկում, որ խորհրդարանական ընդդիմությունը վարչապետի թեկնածու չառաջադրի, բայց չկար երաշխիք, որ համաձայնելու պարագայում այլ բան չէր ասի:

«Ես ձեզ մի բան ասեմ՝ այդ հայտարարությունը լուրջ մի՛ ընդունեք, չեմ բացառում, որ չորեքշաբթի օրը հարցուպատասխանի ժամանակ վարչապետը կասի, որ կարծում է՝ արժե անել ընտրություններ, լուրջ մի՛ ընդունեք ոչ մի հայտարարություն: Արտահերթ ընտրություններ լինելու են՝ երբ, ինչպես՝ կերևա: Այդ հայտարարությունն այնքան լուրջ եք ընդունել, բոլորին հարցնում եք: Իսկ դուք բացառո՞ւմ եք, որ վաղը կասեն՝ անենք»,-ասաց նա:

Էդմոն Մարուքյանն ասաց, որ փորձում են արտահերթ ընտրություններ չանցկացնելու հայտարարություն հետ կապված գնդակը գցել ընդդիմության դաշտ, բայց նոյեմբերի 10-ից այն իշխանության դաշտում է:

«Ընտրություններն անկտրել ձմերուկի պես բան են, չգիտես՝ ինչ արդյունք կլինի, կարծում եմ՝ իշխանություններն իսկզաբանե նպատակ չեն ունեցել ընտրություններ անելու: Հարցը դրել են շրջանառության մեջ, հիմա հանում է, հետո կարող է բերել: Անդադար քաղաքական դաշտը կմնա տուրբուլենտ վիճակում, մարդիկ անընդհատ կպատրաստվեն ընտրություններին, իսկ դրանք կարող են լինել 2023 թվականին: Դե դուք ամեն օր պատրաստվեք, հիմնական ձեր օրակարգերից շեղվեք, բանը գործը թողած՝ դրանից խոսացեք, ռազմական վերազինումը, ռազմագերիները Գորիս-Կապան ճանապարհի խնդիրը թողած՝ դրանից խոսեք»,-ասաց նա:

Էդմոն Մարուքյանն ասաց, որ եթե Սահմանադրությամբ հնարավորություն ընձեռված բոլոր գործընթացները վիժեցվում են, ապա չի բացառում, որ կարող են տեղի ունենալ այլ գործընթացներ:

«Կոնկրետ Վահան Բադասյանի հետ կապված ի՞նչ է։ Մարդը պոռթկում է ունեցել, հայտարարությունը, բնականաբար, չի ողջունվում ոչ մի պարագայում: Բայց ի՞նչ անենք, շատանա՞ն այդ հայտարարությունները, թե՞ չլինեն նման հայտարարություններ: Եթե պրոցեսները չգնան սահմանադրական ճանապարհով կարող են շատանալ այդ հայտարարությունները: Դա օգո՞ւտ է մեր երկրին, բնավ՝ ոչ, օգո՞ւտ է որևէ ձևով երկիրը ցնցումների, բախումների տանելը, բնավ ոչ: Իշխանությունը պիտի լինի ադեկվատ»,- ասաց նա՝ հավելելով, որ իրենց «ճանապարհային քարտեզը» թողնում են սեղանի վրա: