Շենգավիթ համայնքի նախկին թաղապետ, նախկին ՀՀԿ-ական, համապետական բոլոր ընտրություններում մշտապես Շենգավիթ համայնքում եւ մայրաքաղաք Երեւանում ձայներ մոբիլիզացնող եւ ընտրություններում մշտապես բարձր ցուցանիշներ ապահովող Սարգիս Հովհաննիսյանը՝ նույն ինքը«Կադիլակ Սերոժ» շատերիս պես մտահոգ է մեր երկրի վաղվա օրվա, մեր հետագայի ու ճակատագրի հետ կապված:
Թաղային իշխանության նախկին ղեկավարը վստահ է, որ այսօր, առավել քան երբեւէ յուրաքանչյուրիս պարտքն է լինել հայրենիքի, զինվորի, հայ մայրերի ու քույրերի կողքին, քանզի մենք միայն միասնականությամբ, համերաշխությամբ ու ներքին խաղաղությամբ կարող ենք վերագտնել կորսվածն ու փրկել մեր հայրենիքը:

Սարգիս Հովհաննիսյանի խոսքով.

-Մենք հիմա իրավունք չունենք պառակտվելու, իրավունք չունենք մեր ներսի ուժը թուլացնելու.իրավունք չունենք իրար վրա ցեխ շպրտելու, որովհետեւ այդ ամենից օգտվողը՝ միայն եւ միայն թշնամին է լինելու:

-Շատ լավ է ասված. պարոն Հովհաննիսյան, բայց վաղուց հասարակությունը երկփեղկված է. սեւերի ու սպիտակների բաժանված…

-Դե լավ բան չարեցին. հայավարի, մարդավարի մոտեցում չցուցաբերեցին դեռ էն գլխից. այ էդ սեւ ու սպիտակի գծերն էլ հենց «համը հանեցին»: Հենց էդ բաժան-բաժանը սկսեցին. մեզ մասնատեցին, ու մեր ազգը ցավոք, էս վիճակին հասավ:
Թուրքն ո՞վ էր.էդ վախկոտ շունը, որ մեզ հաղթեր: Էդ անհայրենիքները հայ տեսնելուց՝ հազար մետր էն կողմ էին փախնում, բա հիմա դրանց լկտիության չափը տեսնում ե՞ք ուր ա հասել: Ճիշտ ա մեր Հերոս տղերքը, մեր զինվորները, (ես իրանց ցավը տանեմ) ամեն ինչ արեցին… բայց դե տեսաք՝ ինչ «կարկուտ» թափվեց մեր երեխեքի գլխին: Տեսաք սնարյադներով ոնց էին խփում մեր առյուծ տղերքին: Մարդ որ նորից հիշում ա՝խելագարվում ա:

-Տեսանք: Իսկ ինչո՞ւ մինչ այդ չէինք գիտակցում վերահաս վտանգների մասին.ինչո՞ւ հասանք այս կետին:Արդյո՞ք մեղավորության բաժին այս ամենում բացի ներկաներից, չունեն նաեւ հենց նախկինները:

-Գիտեք նախկինները շատ հարցերում գուցե թերացել են, այո բացթողումներ, սխալներ ունեցել են, բայց նախկինների օրոք՝թուրքի մտքով անգամ չի անցել՝ մեր Շուշիին տիրանալ, նրանց մտքով անգամ չի անցել՝ գալ  հասնել պատմական Սյունիք:
Նախկինները՝ Շուշի, Հադրութ չեն տվել, Արցախ չեն զիջել: «Ատամներով պահել են»: Նախկինները թույլ չեն տվել, որ թուրքը էս աստիճան լկտիանա:

-Բայց նախկիններն էլ թալանել են բյուջեն, բանակը...

-Այ ցավտ տանեմ, հազար մարդու հազար բանի մեջ մեղադրում են, բայց կարողանում ե՞ն մինչեւ վերջ ապացուցել:

-Դե հավանաբար հասցրել են հետքերը մաքրել՝ իրենց «կերած-խմածի»:

-Ախր ես ոչ դատարան եմ, ոչ դատավոր, ոչ էլ քննիչ, էդ իրավապահ մարմինները պիտի պարզեն, իմանան: Ես ի՞նչ կարող եմ ասել:

-Ի դեպ, քանի որ դատ ու դատաստանից խոսեցինք, մի ճշտող հարց եւս. Ձեզ բազում անգամներ նկատել ենք հատկապես ՀՀ երկրորդ նախագահ Ռոբերտ Քոչարյանին սատարողների շարքում՝հատկապես դատական գործընթացների ժամանակ: Կարո՞ղ ենք ասել, որ դուք հիմա էլ «ռոբերտ քոչարյանական եք»…այսպես ասած:

-Ախր ինչի եք տենց մեզ ասում՝ էս ինչական եք. տենց ինձ թվում ա ճիշտ չի: Մարդ ենք, քաղաքացի ենք. կարանք չէ՞ մենք էլ մեր վերաբերմունքը ունենանք ցանկացած տիպի գործընթացի հետ կապված:
Դե եթե վերցնենք բոլոր նախագահների գործունեության ժամանակահատվածը , ոնց էլ նայենք. տեսնում ենք, որ համեմատած՝ Ռոբերտ Քոչարյանն ավելի մեծ ներդրում ունի մեր երկրի համար: Ու ապրելով Ռուսաստանում, որ մեկ էլ լսում ես նախագահի ինստիտուտի դեմ ձեռք ա բարձրացվում, լսում ես որ երկրորդ նախագահի դեմ դատական գործընթաց ա սկսվել, իհարկե որպես հայ մարդ՝ շատ վատ ես զգում էդ երեւույթից:

Որ մեկ էլ լսում ես.10 տարի նախագահ աշխատած մարդուն՝ կալանավորել են: Փաշինյանը սխալ բաներ շատ արեց. երեւի կողքի մարդկանց լսեց, ինչ արեց, չգիտեմ: Ստալինը ասում էր չէ. «Ամեն բան որոշում են  կադրերը»: Երեւի էդ սխալ կադրերն էլ՝ սենց վիճակի հասցրեցին մեր երկիրը: Կամ ի՞նչ էր նշանակում . Խաչատուրովի նման հայ մարդուն, կադրին վերցնում՝ ՀԱՊԿ-ից հետ են կանչում: «Կադրավիկ» գեներալ մարդուն:

-Ի դեպ, օրերս բավականին ծավալուն հարցազրույցով հանդես եկավ Ռոբերտ Քոչարյանը, ասելով որ. «Արտահերթ ընտրություններին մասնակցելու ենք եւ կրելու ենք»: Դուք պատրաստվում ե՞ք որեւէ կերպ ներգրավվել  նախընտրական կամպանիայի մեջ, թե՞ ոչ: Հատկապես, որ Շենագավիթ համայնքում բավականին լուրջ էլեկտորատ ունեք:

-Դե ժամանակը կգա, եթե ընտրություններ լինեն՝ կտեսնենք ինչպես կընթանան զարգացումները: Եթե վաղը ընտրություններ լինեն՝ ես հաստատ Ռոբերտ Քոչարյանի կողմնակիցը կլինեմ:
Որովհետեւ ես հասկանում եմ, որ Քոչարյանը «ստրոգի» մարդ ա, մեր ազգը շատ թուլացավ էլի. մեզ հավաքվել, ուժեղանալ ա պետք: Էդ էլ քիչ բան չի. ախր հասկացեք մարդը ի վերջո հզոր պետության ղեկավարի հետ անձնական ընկերություն մեջ ա: Էդ շատ կարեւոր ա, ու «պալիտիկայի» մեջ էդ էլ շատ կարեւոր հանգամանք ա: Եկեք՝ հասկանանք: Վլադիմիր Պուտինը ասում ա չէ՞, որ էդ մարդը իրա ընկերն ա: Բա էլ «մանանա՞» ենք ուզում երկնքից: Թող ի նպաստ հայի՝ ծառայի էդ ընկերությունը: Նիկոլ Փաշինյանն էլ՝ թող Քոչարյանի ընկերությունը օգտագործեր ի շահ մեր ազգի, մեր պետության, ի՞նչն էր իրան խանգարում: Ինչ ա. անձնական հարցեր կայի՞ն՝ իրար մեջ լուծելու:

Տենց անձնական պահերը, Փաշինյանն ու իր թիմը պետք ա առաջին իսկ օրվանից մի կողմ դնեին, ու ումից ինչ կարային՝օգտվեին կոպիտ ասած: Քոչարյանից, Խաչատուրովից սկսած՝ իրանց հաշվարկներով իմացած կրիմինալներից ու գործարարներից վերջացրած, ովքեր  իրանց ասելով լիքը փողեր ունեն:

Ախպեր ջան, փողեր ունեն. էդ փողերը  բերեիր օգտագործեիր՝ երկրի զարգացման համար: Ախր առաջին օրվանից ընենց լավ էր ընտրվել Նիկոլը, որ ասելու չի: Ես էլ եմ Նիկոլին ընտրել, բայց չեմ իմացել, որ վերջը սենց ա անելու:
Ես Քոչարյանի օրոք չեմ աշխատել, բայց որ հիշում եմ իրա օրոք պաշտոնյաները ոնց էին զգաստանում ու աշխատում, էդ արդեն հերիք ա, էդ լիքը բան ա ասում:
Նայեք մարդու ընտանիքին. ավանդապաշտ, օրինակելի ընտանիք են: Համեստ մարդիկ են:

-Բայց սարսափելի հարուստ: Որտեղի՞ց:

-Լավ էլի: Էդ տենց չի. դե թող բերեն ապացուցեն: Ո՞նց կլինի էսքան ժամանակ իրա երեխեքը մի սխալ բան արած լինեին, ու էդ սենսացիա սիրողներն էլ՝ նման դեպքերը չդարձնեին նյութի թեմա: Դե մարդիկ, իրենց պահելու դրսեւորելու ձեւ գիտեն, որովհետեւ: Մարդիկ էսքան ժամանակ, մի հատ ավելորդություն, մի հատ ճոխություն իրանց՝ թույլ տված չկան:

-Ոնց թե. մամուլը պարբերաբար գրում էր, որ երկրորդ նախագահը հաճախակի գնում էր Տանզանիաները՝ որսի: Հիմա դա համեստությա՞ն դրսեւորում է՞ր, երբ աղքատ երկրի երկրորդ նախագահը իրեն նման ճոխություններ էր թույլ տալիս:

-Հա դրա մեջ ի՞նչ կա. Ես էլ եմ որսի գնում:Պրեզիդենտ մարդ ա ՝ կարող ա հրավիրել են՝գնացել ա: Դրա մեջ ի՞նչ կա: Ես էլ, մեծ հաճույքով պարոն Քոչարյանին հրավիրում եմ որսի: Ես էլ կարող եմ իմ հնարավորություններով նման բան կազմակերպեմ, մի հատ էլ սելֆի անեմ: Ի՞նչ կա դրա մեջ: Ձեզ էլ եմ հրավիրում, Փաշինյանին էլ կարամ հրավիրեմ. ծանր բեռ ա վերցրել իրա վրա, ներվերը տեղը չի, թող ինքն էլ գա որսի՝ մի քիչ ներվերը կհանգստանա:Ես բարի մարդ եմ՝բոլորին էլ կարամ հրավիրեմ:

-Լավ է որ մեծ սիրտ ունեք, բայց հիմա մենք լուրջ խնդիրների առաջ ենք կանգնած, պարոն Հովհաննիսյան:Ըստ Ձեզ, ի՞նչ անել ստեղծված իրավիճակից ելքեր գտնելու համար:

-Մեզ ժամանակ ա պետք. մենք էլի հաղթելու ենք: Սենց պատերազմ՝ աշխարհում չի եղել: էսի ուրիշ բան էր, էս ուրիշ վիճակ էր. մեր 18-19 տարեկան երեխեքը թե ոնց կռիվ տվեցին, (ես իրանց ցավը տանեմ) ասելու չի: էդ ոգով ոնց ապրեցին, ես չգիտեմ, ինչ ասեմ: Մենք մեր բոլոր երեխեքի համար, մեր ձեռքից եկածը պետք ա անենք.մենք պարտք ունենք տալու՝ մեր հերոս երեխեքի առաջ:

-Այնուամենայնիվ ռեալ շանսեր տեսնում ե՞ք, արտաքին ու ներքին ճգնաժամը հաղթահարելու...

-Մենք ուրիշ ձեւ չունենք. պետք ա միավորվենք ու հաղթահարենք:

-Ի դեպ պարոն Հովհաննիսյան,  ժամանակին ինչու հեռացաք ՀՀԿ-ից, դուրս եկաք կուսակցությունից, եւ Տարոն Մարգարյանի օրոք էլ լքեցիք թաղապետի պաշտոնը:

-Դե գիտենք ոնց. քաղաքականության մեջ՝ ամեն ինչ հնարավոր ա: Ես թաղապետի աշխատանքից հրաժարվել, ու կուսակցությունից էլ դուրս եմ եկել՝ բազում ներքին անհամաձայնությունների պատճառով: Ես ոնց կամ՝ նույնն եմ մնացել,ու նույնն եմ մնալու միշտ: Բայց էդ ժամանակահատվածում Ձեզ համար ո՞նց ա. համատիրության մի սովորական ղեկավարին փոխելու համար անգամ՝ մեկ էլ տեսնում էիր մինիստր մարդ զանգում էր. ասում էր էդ կադրին մի կպի: Լիքը հարցեր կան՝ մի ուրիշ առիթով՝ Ձեր բոլոր հարցերին կպատասխանեմ:

-Բայց մինչ Տարոն Մարգարյանի ժամանումը, ասում էին բավականին հարթ եւ ջերմ էին Ձեր հարաբերությունները հետագայում արդեն  ՀՀ նախկին վարչապետ Կարեն Կարապետյանի հետ:Ի՞նչ կասեք այդ լուրերի հետ կապված:

-Դե գիտեք ինչ. Կարեն Վիլենիչը թե՛ որպես մարդ, թե՛ որպես պրոֆեսիոնալ՝եղել է միշտ բարձրում: Իրա մակարդակը, գիտելիքները, պատրաստվածությունը, փորձը, հմտություններն ու մարդ տեսակը՝ կարծում եմ շատերը ինձ հետ համաձայն կլինեն, որ ուրիշ հարթության մեջ ա եղել միշտ: Դուք չեք պատկերացնում. թե իրան ինչպես էին ընդունում դրսում, արտերկրում, դե Ռուսաստանում էլ չասեմ: Իրա հետ ոնց են ամեն տեղ հաշվի նստում  ու ոնց են ընդունում իրա գիտելիքների, խելքի, ու մոտեցման ձեի համար:

-Կուզենայի՞ք, որ նա նորից վերադառնար քաղաքականություն:

-Ինչու ոչ: Իրա համար «մի բաժակ սառը ջուր ա» ՝ մեր երկիրը ոտքի հանելը:

-Բայց մարդն եկավ, հետո էլ նեղացրեցին` գնաց…

-Դե ոչինչ, հանուն հայրենիքի փրկության, որ խնդրեն՝ ինձ թվում ա էլի կգա: Ինքը բարձր մարդ ա, վստահ եմ իրա համար հայրենիքին ու հայը՝միշտ առաջին տեղում են:

 

Armenian Info