Վստահաբար ստեղծվել է մթնոլորտ, որի պայմաններում արդարության բանաձեւի հետեւից գնացող ժողովուրդը եւ շատերը նպատակային են համարում սեփական ձայնի քվեի ապահովումը, եւ դա պետք է լինի արտահերթ ընտրությունների միջոցով, բայց  միեւնույն ժամանակ հասկանում ենք, որ այդ ընտրությունների կազմակերպման համար պետք է ճիշտ պահ լինի։ Այս մասին այսօր՝ փետրվարի 8–ին,  ԱԺ-ում լրագրողների հետ զրույցում նշեց ԱԺ անկախ պատգամավոր Գոռ Գեւորգյանը․

«Դեռ տարեվերջին ասում էի, որ ընտրությունները պետք է ինքնանպատակ չլինեն,  դրանք պետք է գան խնդիրը կարգավորելու համար, ոչ թե հավելյալ խնդիրներ ստեղծեն։ Ես չեմ կարծում, որ նման ծայրահեղ լարված սոցիալական մթնոլորտում եւ հանրային փոխհարաբերութունների միջեւ գրանցված այս աստիճան բարձր ատելության պայմաններում կարող ենք գնալ արտահերթ ընտրությունների, բայց միեւնույն ժամանակ  հայտարարությունից առաջ կամ հետո պետք է հստակ նշվի, որ ընտրությունները մնում են իրավիճակից դուրս գալու միակ բանալին, քանի որ մենք սահմանադրական պետություն ենք, եւ Սահմանադրությամբ է ամգրագրված ժողովրդի քվեի իրավունքը եւ ժողովուրդն ինքը պետք է որոշի ՝որ ճանապարհով եւ ում հետ է գնում»,– ասաց Գեւորգյանը։

Անկախ պատգամավորը, ով ամիսներ առաջ լքել էր իշխող «Իմ քայլը» խմբակցությունը,  չցանկացավ խոսել այն մասին, թե իշխանությունները վստահ չեն իրենց ուժերի վրա, այդ պատճառով էլ չեն գնում ընտրությունների։

«Հանրության մեջ այնքան թեժ մթնոլորտ է ձեւավորված, որ այս պայմաններում արկածախնդրություն է գնալ արտահերթ ընտրությունների։ Սա է խնդիրը, ինչքան շուտ սա հասկանան եւ այլընտրանքային լուծումներ առաջարկեն, այնքան լավ թե՛ հանրության, թե՛ պետականության համար»,– նշեց նա։

Անցումային կառավարություն ստեղծելու գաղափարին Գոռ Գեւորգյանը դեմ չէ։

«Դա պետք է լինի համերաշխության, տեխնոկրատների կառավարում, մարդիկ, որոնք արհեստավարժ են, իրենց գործի համար մեկ մասնագետն են։ Դաշտում կան նման ուժեր, այդ մարդկանց տեղը վստահաբար գիտեն, պետք չէ, որ այդ մասին ես հուշեմ։ Մի մոռացեք, որ մենք նաեւ սփյուռք ունենք, եւ կարող ենք խորհրդակցական տարբեր հարթակներ ձեւավորել եւ իրավիճակից դուրս գալու համար»,– նշեց նա։