«Շատ ուսանողներ, որոնք մարզերից են, տները հանձնել են, դժվարությամբ են գտնում վարձակալությամբ բնակարաններ։ Բացի այդ կա նաև ֆինանսական խնդիր»,- նշեց Մանկավարժական համալսարանի բանասիրության ֆակուլտետի ուսանողուհի Սյուզաննան։

Ուսանողների կարծիքով՝ հեռակա ուսուցումն առավել ձեռնտու է նաև այն պատճառով, որ ուսանողները խնայում են այն ժամանակը, որը ծախսվում է ճանապարհի վրա։

«Օրվա գրաֆիկս ավելի լավ էի կազմակերպում, ավելի մոտիվացված էի։ Աշխատանքիս հետ կարողանում էի համատեղել»,- ասաց Երևանի պետական համալսարանի լրագրության ֆակուլտետի ուսանողուհի Լիանա Դուրյանը։

Որոշ ուսանողներ, սակայն, նշեցին, որ կան ֆակուլտետները, որոնցում հեռավար ուսուցում անցկացնելն արդյունավետ չէ։

«Շատ գոհ եմ, որ արդեն գնում ենք դասի։ Ես ապագա նկարիչ եմ, և հեռավար ձևով չէիր կարող ցույց տալ նկարներդ դասախոսիդ քննարկելու համար»,- ասաց Օնիկ Մինասյանը։

Ուսանողների մի մասը գոհ չէ կրթական համակարգից՝ պրակտիկան քիչ է, դասագրքերը՝ հին։

 «Ստացածը պետք է նաև կիրառել։ Բացի այդ մենք շատ դասեր անցնում ենք հին դասագրքերով, որոնք միայն վերահրատարակվում են, բայց որևէ փոփոխություն չեն կրում կամ հնարավոր է՝ դասախոսին հարց տաս այդ գրքից, բայց տեղյակ չլինի»,- նշեց Բժշկական համալսարանի ուսանողուհի Հասմիկ Ճաղարյանը։