ՀՀ ֆինանսների նախարարությունը հրապարակել է Երևանի քաղաքապետարանի 2021թ-ի գնումների պլանը, որով նախատեսվում է ծախսել 8 126 210 852 դրամ գումար։

Ըստ այդ պլանի, նախատեսվում է ձեռք բերել 100 հատ ընդհանուր 600 հազար դրամ արժեքով խոհանոցային աթոռներ, 18 հատ խոհանոցային սեղան՝ յուրաքանչյուրը՝ 30000 դրամ արժեքով (ընդհանուր 540000 դրամ), 30 հատ ղեկավարի բազկաթոռ, յուրաքնաչյուրը՝ 40300 դրամ արժեքով (ընդհանուր 1 209 000դրամ)։ Նախատեսվում է ևս 100 սեղան գնել, որից 40 հատը՝ 1 000 000 դրամով, իսկ 60 հատը՝ 1 800 000 դրամով։ Եւս 100 գրասենյակային աթոռի գնման համար էլ՝ մետաղյա կարկասով, քաղաքապետարանը կվճարի 1 200 000 դրամ։ 

Նախատեսվում է նաև գնել 90 հատ ծաղկեպսակ՝ ընդհանուր 450 000 դրամ արժողությամբ, ծաղկային կոմպոզիցիաներ՝ 160 հատ՝ ընդհանուր 1 600 000 դրամ և 60 հատ՝ 1 800 000 դրամ արժողությամբ։ 1000 հատ մեխակ էլ կգնի՝ յուրաքանչյուրը՝ 100 դրամով։

Սպորտային միջոցառումների կազմակերպման համար Երևանի քաղաքապետարանը նախատեսում է ծախսել 55 200 000 դրամ, հանգստյան գոտիների կառուցման և պահպանման աշխատանքների համար քաղաքապետարանը կհատկացնի 319 776 375 դրամ։ 17 490 100 դրամ էլ կհատկացվի Կարեն Դեմիրճյանի հիշատակը հավերժացնող հուշարձանի կառուցման և պահպանման ծառայությունների համար։ 1.5 մլն դրամ էլ կհատկացվի դպրոցական օլիմպիադաների կազմակերպչական աշխատանքների համար։ Թվով 5 պոլիկլինիկաների ընդհանուր շինարարական աշխատանքների ու տեխնիկական հսկողության ծառայության համար քաղաքապետարանը նախատեսել է հատկացնել 165 210 820 դրամ։