«Ինչ-որ մեկը կարո՞ղ է ասել՝ ինչու է առ այս պահը ՀՀ-ում պահպանվում ռազմական դրությունը, ինչու ռազմական դրությունը չի հանվում։ Ի վերջո, Ադրբեջանն ինչ ուզում, անում է»,-ԱԺ հայտարարությունների ժամին նման հարց հնչեցրեց «Բարգավաճ Հայաստան» խմբակցության պատգամավոր Նաիրա Զոհրաբյանը։

«Ադրբեջանցի զինվորականները GPS-ն գրկած՝ Սյունիքը ոնց ուզում, ձևում են։ Գնացեք Ներքին Խնձորեսկ, ոնց ուզում, քանի մետր, քանի կիլոմետր, աջ-ձախ, հյուսիս-հարավ, գալիս են, նույնը Կապանի հարակից բնակավայրերում։ Ինչո՞ւ է պահպանվում ռազմական դրությունը, երբ այս իշխանությունը ռազմագերիների խնդրով, անհետ կորածների խնդրով, զբաղվում է ընդամենը «գալչկայի» համար»,- նշեց պատգամավորը՝ հավելելով․ «ազերիները հենց «օդոլժենի» են անում, ծնողները ռուս խաղաղապահների հետ որդիներին են փնտրում»։

Զոհրաբյանը հիշեցրեց նաև, որ ադրբեջանցիները թույլ չեն տվել մեր հայրենակիցներին գնալ Դադիվանք․ «Եթե մինչ այդ պահանջել են միայն գնացողների քանակ, այժմ արդեն նաև անուններ են ուզել․․․։ Մյուս օրն էլ արյան անալիզ կուզեն, հաջորդ օրն էլ կասեն՝ ոչ, ընդհանրապես թույլ չենք տալիս անցնել սահմանը»,- կարծիք հայտնեց ԲՀԿ-ական պատգամավորը։