Այն մասին, թե ինչպես է Երևանի քաղաքապետարանը, ի դեմս կրթության վարչության, գործը թողած թիթեռնիկ է նկարում. ԱԺ հայտարարությունների ժամին իր ելույթն այսպես սկսեց «Լուսավոր Հայաստան» խմբակցության պատգամավոր Աննա Կոստանյանը:

Պատգամավորը նշեց, որ Երևանի քաղաքապետարանը, հանդիսանալով հանրակրթության հիմնական դպրոցների լիազորված մարմին, ոտնահարում է քաղաքացիների տարրական իրավունքները: Նա պատմեց, որ իրեն է դիմել մի քաղաքացի, որի խնդրի մասին էլ ինքը բարձրաձայնելու է: Նա ասաց, որ Երևանի թիվ 197 հիմնական դպրոցում տեղի են ունեցել անօրինություններ, որի առնչությամբ քաղաքապետարանը ցուցաբերել է բացարձակ անտարբերություն և ոչ մասնագիտական մոտեցում:

«2020-ի հուլիսի 2-ին 197 հիմնական դպրոցի տնօրենի 3 տեղակալներ այդ ժամանակվա գործող տնօրենի պաշտոնավարման ավարտին դիմում են ներկայացրել քաղաքապետին տնօրենի ժամանակավոր պաշտոնակատարի պարտականությունները ստանձնելու համար: Երեք հավանական թեկնածուներից ընտրվեց նույն տնօրենը, որի պաշտոնավարման ժամանակահատվածում տեղի էր ունեցել դպրոցական փաստաթղթում՝ մատյանում կեղծիք, երեխայի գնահատականի փոփոխություն, ինչի համար հարուցվել է քրեական գործ, սակայն, այս ամենով հանդերձ, Երևանի քաղաքապետարանը հաստատել է այս տնօրենին իր պաշտոնում այս տարվա հունվարին»,- պատմեց նա:

Պատգամավորի խոսքով՝ թեկնածուներից մեկի կողմից եղել է երեք նամակ-դիմում քաղաքապետարան, թե ինչ չափորոշիչների հիման վրա է կատարվել ընտրությունը, իսկ պատասխանը եղել է՝ ընտրվել է երեք թեկնածուներից մեկը: «Ի՞նչ է սա, եթե ոչ թիթեռնիկի նկարչություն: Այս հարցը դեռևս նախորդ նախարարի ժամանակ է բարձրաձայնվել, այս մասին տեղեկացվել է նաև վարչապետի աշխատակազմը, սակայն որևէ լուծում չի տրվել: Խնդիրը բարձրաձայնեցի՝ հույս ունենալով, որ քաղաքապետարանն այս անգամ գոնե զերծ կմնա իր կողմից մշտապես իրականացվող ծածկադմփոցներից»,- ասաց նա: