Երբ դուք, Նիկոլ Փաշինյանի գլխավորությամբ, կլքեք ձեր աթոռները, իսկ դա անխուսափելի է, ապա հետո լինելու է արտահերթ ընտրություններ, ի՞նչ կա բարդ հասկանալու: Այս մասին Ազգային ժողովում ասաց «Բարգավաճ Հայաստան» խմբակցության պատգամավոր Արման Աբովյանը՝ նշելով, որ իշխանությունը զուգահեռ իրականության մեջ է ապրում:

Նա նշեց, որ արտահերթ ընտրությունների մեխանիզմներն արդեն քննարկելու թեմա է և խնդրեց չմանիպուլացնել և չշահարկել այն:

«Հասկանում եմ, որ ապրելը զուգահեռ իրականության մեջ հետաքրքիր է, քանի որ կարելի է շատ բան չտեսնել, բայց երբ այս ամբիոնից խոսվում է համախմբման կոչի մասին, ես ուզում եմ հարցնել ինչի՞ շուրջ, որ ձեր իշխանության օրոք Շուշին Շուշա են անվանո՞ւմ, որ ձեր իշխանության օրոք Արցախի 75 տոկոսը թուրքի ձեռքն է, թե որ հարավ գնացող ճանապարհը փաստացի վերահսկում են ադրբեջանցիները. և որքան էլ պատմեք, որ սահմանագիծ չէ, փաստը մնում է փաստ՝ թուրք զինվորը հայկական հողը վերահսկում է»,-ասաց նա:

Պատգամավորը կոչ արեց իշխանություններին իրենք իրենց հարց ուղղել: «Մեզ մի ասեք, ժողովրդին էլ մի ասեք, դուք ձեր մեջ, երբ մնում եք մենակ, դուք ձեզ հարցրեք՝ ինչումն է կայանում պատասխանատվությունը և ինչ հետևանքներ պետք  է բխեն պատասխանատվության ինստիտուտից: Այո՛, արել եք, այո՛, պետք է հեռանաք և հաստատ իմացե՛ք, որ հեռանալու եք»,-ասաց նա: