Շատ ցավալի է, բայց փաստ, որ հայտարարությունների ժամին 4 ելույթ վերաբերում է դպրոցներում տեղի ունեցող ընտրություններին, և 4-ն անօրինական գործողություններ են, որոնցից տուժում է կրթություն ստացողը։ Այս մասին ԱԺ հայտարարությունների ժամին ասաց «Իմ քայլը» խմբակցությունը լքած պատագամավոր Սոֆյա Հովսեփյանը։

«Եթե մենք տարիներով խնդիր ենք ունեցել, որ դպրոցում քաղաքական ընտրություն է կատարվում՝ քաղաքական պատվերով կամ քաղաքական հայացքներով, այսօր նույն իրավիճակն է։ Մենք միշտ խոսեցինք, որ կրթությունը պետք է լինի ապաքաղաքական»,- ասաց նա՝ ներկայացնելով Շիրակի մարզկենտրոն Գյումրիի թիվ 25 դպրոցում կայացած ընտրությունները։

«2020-ի սեպտեմբերին Գյումրու թիվ 25 դպրոցում տեղի է ունեցել տնօրենի ընտրություն, որին մասնակցել է այդ դպրոցի գործող ուսուցիչը, և Գյումրու թիվ 9 դպրոցի գործող փոխտնօրենը։ Ձայները բաշխվել են 4-2 հարաբերությամբ, որտեղ գործող ուսուցիչն ստացել է 4 ձայն։ Այն մարդու եղբայրը, ով մասնակցում էր մրցույթին, մարզպետարանի կարկառուն ներկայացուցիչ էր։ 2 ձայնը հաղթեց 4-ին, փոխվարչապետի ձեռքով նշանակվեց։ Որևէ բացատրություն չտրվեց»,-ասաց նա։

Պատգամավորն ընդգծեց՝ հարցը բարձրաձայնել էր նաև վարչապետի մոտ, իրեն էլ խոստացել էին, որ հետևողական կլինեն, իսկ հետևողականությունը, Հովսեփյանի խոսքով, դրսևորվել է նրանով, որ արդեն մեկ շաբաթ է՝ այդ դպրոցում դասերը խաթարված են։

«Սարսափելին այլ բան է․ պարզվում է՝ ԱԱԾ-ն, փոխանակ այսօր զբաղվի դիակների դուրսբերման հարցերով, գերիների հարցերով և այլն, զբաղվում է ծնողներին և ուսուցիչներին վախեցնելու գործով։ Ոստիկանությունն էլ է նույն հարցով զբաղվում։ Ես կոչ կանեմ՝ զերծ մնացեք դպրոցից և թույլ տվեք, որ օրենքի շրջանակում լուծվի այդ դպրոցի հարցը, այլապես սա հերթական քաղաքականացված նշանակումը կլինի»,-ասաց պատգամավորը։

Մանրամասները՝ տեսանյութում։