Պարոն նախարար, ստիպված եմ Ձեզ հիշեցնել, որ Դուք ՀՀ ԿԳՄՍ նախարարն եք, ոչ թե ԵՊՀ-ի պաշտպանը: Այս մասին խորհրդարանում, դիմելով նախարար Վահրամ Դումանյանին, հայտարարեց ԼՀԿ-ական պատգամավոր Գևորգ Գորգիսյանը, ում դուր չի գալիս այն, որ մայր բուհը պետք է ունենա հատուկ կարգավիճակ ու առանձնահատուկ ֆինանսավորում. «Երբ գրված է, որ ԵՊՀ-ն բացառիկ հաստատություն է, Ձեր հնչեցրած մտքերն ու հիմնավորման մեջ գրվածները մոտ են եթե ոչ ցնդաբանության, ապա գոնե ակադեմիական ռասիզմի: Դա ընդունելի չէ: Մենք պարտավոր ենք բոլոր պետական բուհերի համար ապահովել նույն պայմանները: Սա Ձեր կողմից ցուցաբերված առնվազն ռասիզմ է»: «Պարոն պատգամավոր, Ձեզ կոչ եմ անում կոռեկտության, զսպվածության ու հարգալից արտահայտաձևեր ընտրեք: Ինձ պետք չէ հիշեցնել իմ զբաղեցրած պաշտոնը: Ես չեմ մոռացել: Ես ԵՊՀ-ի ներկայացուցիչը չեմ, ես ԿԳՄՍ նախարարն եմ, պետք չէ հիշեցնել: Կգնաք ռասիզմի գնահատականներ միջազգային դատարաններում կհնչեցնեք»,-ասաց նախարարը՝ հավելելով, որ պետք է վերադառնալ պրոֆեսիոնալ դաշտ, որտեղ պատրաստ է քննարկել հարցերը: «Եթե ասում եք, որ ԵՊՀ-ն բացառիկ է, ինչով է նրա մշակութային գործունեությունն ավելի բացառիկ, քան՝ կոնսերվատորիայի կամ թատերական ինստիտուտի, ինչով է նրա գիտական գործունեությունն ավելի բացառիկ, քան՝ ԵՊԲՀ-ի կամ Պոլիտեխնիկական համալսարանի, որոնք բոլորը նույն ստատուսն ունեն, պետության կողմից հիմնադրված կառույցներ են: ԵՊՀ-ի բացառիկությունը որևէ կերպ հիմնավորված չէ: Սա խտրականություն է, որը ես կոչում եմ ռասիզմ»,-ասաց պատգամավոր Գորգիսյանը: