ԱՄՆ նախագահ Ջո Բայդենը Չինաստանի ղեկավար Սի Ծինփինի հետ առաջին հեռախոսազրույցում հայտարարել է, որ մտահոգված է Պեկինի գործողություններով և կպաշտպանի ԱՄՆ-ի շահերը, Սպիտակ տան տարածած հաղորդագրությանը հղումով գրում է CNN-ը։

«Նախագահ Բայդենը հաստատել է, որ իր առաջնահերթությունը ամերիկացիների անվտանգության, բարգավաճման, առողջության և կենսակերպի պաշտպանությունն է, ինչպես նաև ազատ և բաց Հնդկա-խաղաղօվկիանոսյան տարածաշրջանի պաշտպանությունը:

Նախագահ Բայդենն ընդգծել է Պեկինի հարկադիր և անազնիվ տնտեսական գործողությունների, Հոնկոնգում հետապնդումների, Սինցզյանում մարդու իրավունքների խախտման և տարածաշրջանում, այդ թվում՝ Թայվանի նկատմամբ ավելի ու ավելի համառ գործողությունների վերաբերյալ իր մտահոգությունը»,- հայտնել է Սպիտակ տունը:

Սպիտան տան հաղորդագրության մեջ նաև նշվում է, որ «նրանք կարծիքներ են փոխանակել COVID-19 համաճարակի դիմակայության և գլոբալ առողջապահության ընդհանուր մարտահրավերների, կլիմայական փոփոխությունների վերաբերյալ»։