Facebook սոցիալական ցանցը կնվազեցնի քաղաքական բովանդակության տեղեկատվության քանակը, հաղորդում է ամերիկյան ընկերության մամուլի ծառայությունը, փոխանցում է ՏԱՍՍ-ը:

Ըստ Facebook-ի՝ այժմ քաղաքական բովանդակությունը կազմում է հրապարակումների ընդհանուր թվի 6%-ը: «Ինչպես վերջերս ֆինանսական հաշվետվության մեջ նշել է Մարկ Ցուկերբերգը, մարդկանց կողմից հետադարձ կապը ցույց է տալիս, որ նրանք չեն ցանկանում, որ քաղաքական բովանդակությունը հեղեղի լրահոսը: Հաջորդ ամիսների ընթացքում մենք կաշխատենք, որպեսզի ավելի լավ հասկանանք մարդկանց տարբեր նախասիրությունները եւ փորձարկենք մի քանի մոտեցումներ»,- ասվում է հաղորդագրության մեջ:

Ընկերության ծրագրերի համաձայն, առաջին քայլը կլինի այս շաբաթ Կանադայի, Բրազիլիայի եւ Ինդոնեզիայի բնակիչների համար քաղաքական բովանդակության կրճատումը, ամերիկացի օգտագործողների համար նմանատիպ գործողությունները կներդրվեն մի քանի շաբաթից:

Նշվում է, որ սահմանափակումները չեն առնչվի պետական կառույցների կողմից տարածվող տեղեկատվությանը, անփոփոխ կմնա նաեւ տեղական եւ դաշնային առողջապահական մարմիններից նոր տեսակի կորոնավիրուսի վերաբերյալ հրապարակումների քանակը:

ԱՄՆ 45-րդ նախագահ Դոնալդ Թրամփի կողմնակիցների կողմից ԱՄՆ Կոնգրեսի շենքում հունվարի 6-ին կատարված անկարգությունների հաջորդ օրը Facebook-ի ղեկավարությունը սառեցրել էր Facebook-ում եւ Instagram-ում Թրամփի հաշիվները մինչ նրա նախագահության ժամկետի ավարտը`հունվարի 20-ը, իսկ հունվարի 9-ին նախագահի հաշիվը ընդմիշտ արգելափակել էր Twitter-ը, որտեղ Թրամփն ուներ շուրջ 89 միլիոն բաժանորդ: