Մեզ նոր գաղափարախոսություն է պետք պատերազմից հետո, բայց պետք է հասկանալ՝ արդյո՞ք մենք ճիշտ ենք հասկանում՝ ինչ է պետք,  և ինչ է ուզում մեր հանրությունը: Երբեմն, երբ հանդիպում եմ ձևակերպումների, թե լավ է, որ ամեն ինչ վերջացավ, ոչինչ, որ պարտվեցինք, որ ինչ-որ բաներ հանձնեցինք, նվիրեցինք, կարևորը՝ երեխեքը Արցախում էլ չեն ծառայելու, լավ է, որ 35 հազարը փրկվեց: Այս ամենինչին շատ դժվար է հանգիստ հակադարձել, ամեն դեպքում պետք է հասկանալ՝ մենք ենք մեծամասնություն, թե նրանք:

Այս մասին այսօր երիտասարդների հետ հանդիպման ժամանակ ասաց ադրբեջանագետ Անժելա Էլիբեգովան՝ խոսելով պատերազմի ավարտի, Հայաստանի և Ադրբեջանի դիրքորոշումների մասին:

«Արդյո՞ք մեր հանրությունը հասկացել է աղետի մասշտաբները և արդյոք պետք է նրանց օգնել, որ հատակից դուրս գան: Այդ գաղափարախոսությունը արդեն պետք է լիներ, բայց մենք երեք ամիս է՝ ստիպված ենք այլ հարցրով զբաղվել, որոնք օրակարգային են. պայքարել անհասկանալի բանի դեմ, որը երեք ամիս է՝ գոյություն չպիտի ունենար, բայց մենք դեռ ռեսուրս, նեռվ, ժամանակ ենք ծախսում բաների վրա, որոնք պետք է մեզ համար երեք ամիս առաջ փակված լինեին և Աստված գիտի, թե ինչքան ենք դեռ պայքարելու»,-ասաց նա:

Ադրբեջանագետը նշեց, որ Ադրբեջանն այս ռևանշին պատրաստվել է 26 տարի և իր ամբողջ ռեսուրսն ուղղված էր դրան, և սրան զուգահեռ պետք է մենք էլ հասկանանք, թե որն է մեր ունեցածը և կարողությունը, սակայն ըստ նրա՝ մենք դեռ չենք հասել այդ շեմին:

Էլիբեկովան անդրադարձավ նաև Ադրբեջանի և Իսրայելի համագործակցության՝ Հայաստանի համար վտանգ ներկայացնելու հարցին: Ըստ նրա՝ Իսրայելն այս կոնֆլիկտում բացահայտ չէր երևում, քողարկված աջակցություն էր ցուցաբերում և այս առումով զարգացումը դեռ առջևում է, որովհետև Իսրայելը ևս ունի իր շահերը: