Քաղաքաշինության նախարարությունն ավելի մեծ լիազորություններ ուներ, քան այժմ ունի կոմիտեն: Այս մասին «Առաջին լրատվական»-ի հետ զրույցում ասաց Քաղաքաշինության կոմիտեի նախագահ Արմեն Ղուլարյանը՝ հավելելով, որ այնուամենայնիվ, կոմիտեի աշխատանքների և պատասխանատվության ծավալը չի փոքրացել:

«Հայասատնի սահմաններում բնակֆոնդը հաշվառված է, կառավարության կողմից համապատասխան աջակցությունները տրամադրված են: Սյունիքի մարզի Շուռնուխ գյուղում նոր թաղամաս է կառուցվում կառավարության ծրագրի շրջանակներում՝ պետբյուջեի միջոցով, իրականացվել են ճանապարհների նշահարման աշխատանքները, զուգահեռ նաև նախագծման աշխատանքներ են իրականացվում, և՛ հողամասերը պետք է բաշխվեն, և՛ պետք է սկսվի տների շինարարությունը: Որոտանում նույնպես տնատիրության խնդիր կա, որը պետք է լուծվի:

Ճանապարհի անվտանգության խնդիրը իրականացվում է համապատասխան սահմանապահ կառույցների կողմից, ճանապարհի շինարարության պահպանման խնդիրը իրականացնում է ՏԿԵ նախարարությունը: Սահմանների հստակեցման հետ կապված որոշ թվով բնակելի տների տեղափոխման անհրաժեշտություն կա, այդ նպատակով է իրականացվում Շուռնուխի նոր թաղամասի կառուցումը: Մենք նպատակ ունենք չսահմանափակվել 12-13 տների հարցով, փորձենք ավելի ընդլայնել շինարարությունը, որովհետև կլինեն նաև մարդիկ, որոնք կցանկանան բնակվել Շուռնուխում: Նախատեսում ենք այնտեղ գյուղատնտեսական մթերքների արտադրության, ջերմոցային տնտեսության, հասարակական կառույցների հիմնում, ինչը կնպաստի բնակչության զբաղվածության հարցի լուծմանը:

Անվտանգ ճանապարհների խնդիրը պետք է մեր ուշադրության կենտրոնում լինի և եթե հնարավորություն կա, ունենալ շրջանցիկ, ավելի անվտանգ ճանապարհ: Այսօր  Սյունիքի մարզում ճանապարհների անվտանգության խնդիր չունենք: Արցախում կա այդպիսի խնդիր: Այդ խնդիրը քննարկվել է, Արցախի համապատասխան մասնագետները գտել են լուծում, որ ավելի անվտանգ և ապահով ճանապարհ լինի»,- նշեց Ղուլարյանը: