Արդեն 14 օր է Գյումրիի թիվ 25 դպրոցում գործադուլ-դասադուլ է։ Աշակերտների ծնողները եւ ուսուցիչները դեմ են նորանշանակ տնօրենին եւ պահանջում են հաշվի առնել իրենց ձայնը եւս նշանակում կատարելիս։ Բանն այն է, որ նոր տնօրենի մրցույթի համար առավելագույն միավոր հավաքել է նույն դպրոցի մանկավարժներից մեկը /5 հնարավորից 4 միավոր/, ինչպես նաեւ Գյումրու թիվ 9 դպրոցի փոխտնօրենը /2 միավոր/։

ՀՀ փոխվարչապետ Տիգրան Ավինյանն էլ որոշել ու նշանակել է թիվ 9 դպրոցի փոխտնօրենին։ Արդյունքում թիվ 25 դպրոցի ուսուցիչներն ու ծնողները դուրս են եկել բողոքի ու արդեն 14 օր հարցը լուծում չի ստանում՝ կողմերի ոչ մեկը չի ուզում նահանջել։ Հարցը հասել է Երեւան, սակայն դեռ անարդյունք։

Հայտնի է, որ ՀՀ Մարդու իրավունքների պաշտպանը եւս անհանգստացած է թեմայով, հատկապես, որ խաթարվում է երեխաների կրթության իրավունքը։ Այս օրերին տեղ են գտել նաեւ ծնողների, թեման լուսաբանող տեղի լրագրողներից մեկի հանդեպ ճնշումներ գործադրելու փորձեր։ Գործադուլը շարունակվեց նաեւ այսօր։

Մարզի կրթության ոլորտի պատասխանատուները «անհետ կորած են»՝ Google-ով որոնես չես գտնի։ Մարզային իշխանություններն ընդհանրապես այս հարցում ցույց տվեցին իրենց կատարյալ ապիկարությունը եւ նոր մարզպետը եթե այսպես շարունակի, կտապալի իր աշխատանքը այնպիսի բարդ մարզում, ինչպիսին Շիրակն է։