Երևանում գործարկվել է նոր շարժակազմով 38 համարի երթուղին:

Այս մասին «Ֆեյսբուքի» իր էջում գրել է Երևանի քաղաքապետ Հայկ Մարությանը:

«Այսօր՝ վաղ առավոտից նոր շարժակազմով սկսեց աշխատել 38 համարի երթուղին։ Այսուհետ 11 փոքր ավտոբուսով համալրված երթուղին առավոտյան 07.00-ից կաշխատի Ծարավ աղբյուր թաղամասից, Կենտրոնով մինչև «Երևանի ՋԷԿ» և հակառակ ուղղությամբ»,- գրել է Մարությանը:

Քաղաքապետը հիշեցրել է, որ պետք է վճարել նստելիս, մետաղադրամի համար նախատեսված սարքը ընդունում է միայն 100 դրամանոցներ, շուտով կստեղծվի նաև էլեկտրոնային վճարման համակարգ:

«Առաջիկայում մոտավորապես 10-15 օր հաճախականությամբ նոր երթուղիներ կշահագործենք և այդ մասին կտեղեկացնենք հանրությանը»,- նշել է քաղաքապետը: