Մենք երբեք չենք բանակցել այն մասին, թե ինչ ենք տալու, մենք մշտապես բանակցել ենք այն մասին, թե մենք ինչ ենք ստանալու։ Այդ մասին ասել է ՀՀ երրորդ նախագահ Սերժ Սարգսյանը՝ «Արմնյուզ» հեռուստաընկերությանը տված հարցազրույցում:

«Բայց բանակցությունները այս մարդկանց համար տալու կամ չտալու խնդիր էին։ Մեր ցանկացածը և մեր կարմիր գիծն այն էր, որ Լեռնային Ղարաբաղը երբեք չլիներ Ադրբեջանի կազմում, երբեք։ Դա էր մեր կարմիր գիծը, և մենք այդ գիծը պաշտպանել ենք մինչև 2018-ի ապրիլի 23-ը», - նշել է Սարգսյանը:

Նա հերքել է տեսակետը, թե հայկական կողմը բանավոր համաձայնել է 7 շրջանները զիջել՝ Ապրիլյան պատերազմը կանգնեցնելու գնով:

«Իրականության մեջ այդպիսի բան չի եղել։ Ապրիլյան պատերազմը կանգնեցվել է Ռուսաստանի միջնորդությամբ, ում դիմել է Ադրբեջանը, որովհետև ռազմական գործողությունների ընթացքում ստացել է ուժեղ հակահարված, և, կրելով մեծ կորուստներ, ստիպված է եղել նստել բանակցային սեղանի շուրջ», - ասել է Սարգսյանը:

Նրա խոսքով, հայկական կողմից ակնկալվում էր ստորագրել հրադադարի նոր համաձայնագիր, ինչի հետ Երևանը չի համաձայնվել։

Մանրամասները՝ տեսանյութում: