Պատերազմում անհետ կորած համարվող Էջմիածնի N զորամասի զինծառայողների հարազատները չեն բացառում, որ կրկնակի ԴՆԹ փորձաքննություն կպահանջեն, կառույցին չեն վստահում։ Անհետ կորած զինվորներից մեկի մայրը «Փաստինֆո»-ի հետ զրույցում մտահոգություն հայտնեց առ այն, որ կառույցը ճիշտ քաղաքականություն չի վարում, պետք է ամբողջովին մարդուն հավաքեն, հետո ասեն՝ պատասխան է եկել, իսկ այս կերպ խուճապ են առաջացնում։

«Ես չգիտեմ՝ իրենք խուճապ են առաջացնում, որ մենք լռե՞նք։ Իրենք չգիտեն, կարծում են, որ կրակի հետ խաղալով կարող են հանգցնել կրակը, բայց այս դեպքում խաղում են լավայի հետ, իսկ լավան ոչ մի դեպքում չի հանգի, կհալեցնի բոլորին»,- նշեց ծնողներից մեկը՝ հավելելով, որ որևէ մեկը թող չհամարձակվի խաղեր տալ, որովհետև ԴՆԹ փորձաքննության բոլոր եզրակացությունները կուղարկվեն արտերկիր՝ կրկնակի փորձաքննության։

«Եթե հանկարծ Աստված մի արասցե, որևէ վրիպում լինի, ինչպես՝ երեխեքին վրիպումով տարան կրակի բերան, հանկարծ չվրիպեն ԴՆԹ-ի հարցում։ Եթե հանկարծ վրիպեն, ամբողջ Եռաբլուրը կխառնվի իրար և բոլորը կվերաթեստավորեն։ Թող չանեն, թող մեր քիմիկների հետ նման բան չանեն։ Հանկարծ սայթաքում չանեն»,- նշեց նա։