Ո՞նց կարելի էր վերցնել ու 2 տարում 3 ԳՇ պետ փոխել: Արա, ԳՇ պետը ձեզ համար խաղալի՞ք է: Դրանցից որևէ մեկը պատկերացնո՞ւմ է, թե ինչպիսի գործառույթներ ունի ԳՇ պետը, ինչպիսի փորձառություն պետք է լինի:

Ինչպե՞ս կարելի էր ՊԲ երեք հրամանատար փոխել: Լևոն Մնացականյանը, որ երկու պատերազմի փորձ ուներ, ինչպես կարելի էր նրան փոխել միայն այն պատճառով, որ նախկին էր: Այսինքն, պրոֆեսինալներին փոխել հարմարվողներո՞վ:

9 պաշտպանական շրջանների հրամանատարներին փոխել էին, ընդ որում որոշ դեպքերում՝ 2-3 անգամ: Բոլոր կենտրոնական ենթակայության զորամասերի հրամանատարներին բացառությամբ մեկի, փոխել էին: Ինչո՞ւ էին փոխել:

Որ մենք դավադրություն չանեի՞նք: Մենք ոնց կարող էինք նման բան անել մեր հայրենիքի հանդեպ: Այդ իրենք են ունակ դրան, իսկ մենք նման բան մտածելու առիթ չենք տվել: Այս մասին հարցազրույցի ժամանակ հայտարարեց ՀՀ երրորդ նախագահ Սերժ Սարգսյանը:

«Այնպիսի հարվածներ հասցրեցին բանակին, հետո էլ փորձում են բանակի վրա գցել: Մարտի դաշտում բանակն էր, բայց այն այլևս չուներ այն հրամանատարները, որը պետք ՝ ունենար, չուներ այն ոգին, որը պետք է ունենար:

Այդ բանակը, ցավոք, մնաց միայնակ՝ ոչ մարդավարի լրահամալրում կազմակերպեցին, ոչ էլ հայաստանյան հատվածի անգամ կեսը մասնակցեց, ապշելու բան է»,-ասաց նա:

«Հայկական բանակի մեծասնությունը չի ներգրավվել այս մարտական գործողություններում: Տարօրինա՞կ չէ: Հիմա պետք է հեքիաթներ պատմեն, թե զորքը պետք էր ՀՀ սահմանները պահելու համար: ՀՀ սահմանները պահելու մի քանի ձևեր կային:

Նախ մենք մեր դաշնակցի հետ ունենք 3 պայմանագիր, համաձյան որի նրանք պարտավոր են մասնակցել մեր սահմանների պաշտպանությանը: Ընդ որում, քեզ մեկ ամիս առաջ առաջարկել են զորավարժությունների տեսքով: Համաձայնությունը տայիք։

Ասեիք, որ մեր զորքը տանելու ենք Արցախ, խնդրում ենք մեր անվտանգությունն ապահովեք: Մենք դիմե՞լ ենք մեր դաշնակցին, չենք դիմել: Բայց այլ տարբերակ էլ կար: Ինչու պահեստազորայիններին, կամավորներին ուղարկեցինք այնտեղ։ Մենք նրանց կարող էինք ուղարկել ՀՀ սահմաններ, կանոնավոր զորքը տանել այնտեղ»: