«Լուսավոր Հայաստանը» նորմալ է վերաբերվում Արցախում ռուսերենը երկրորդ պետական լեզու դարձնելու նախաձեռնությանը
Ես նորմալ եմ վերաբերվում Արցախում ռուսերենը երկրորդ պետական լեզու դարձնելու նախաձեռնությանը: Այս մասին փետրվարի 17-ին Ազգային ժողովում լրագրողների հետ զրույցում ասաց «Լուսավոր Հայաստան» կուսակցության եւ նրա խորհրդարանական խմբակցության ղեկավար Էդմոն Մարուքյանը՝ մեկնաբանելով Արցախում մշակված օրենսդրական նախաձեռնությունը, որի համաձայն Լեռնային Ղարաբաղի Հանրապետությունում ռուսերենը կդառնա երկրորդ պետական լեզու:
Նա, մասնավորապես, նշեց, որ նման նախաձեռնությունը միանգամայն տրամաբանական է եւ արդարացված: «Մենք ընդամենը երկու տարբերակ ունենք՝ կա՛մ Արցախում պաշտոնական լեզու կդառնա ադրբեջաներենը, եւ հայերենն ամբողջությամբ կանհետանա, կա՛մ հայերենի հետ այնտեղ կօգտագործվի ռուսերենը, որովհետեւ այնտեղ է գտնվում ռուսական մեծ զորախումբ: Հիմա դուք ցանկանում եք, որ այդ զորախումբը ապահովի խաղաղություն եւ մեր անվտանգությունը, բայց նրանց լեզվով ոչ մի բան չլինի՞: Մի՞թե դա արդարացի է»,- հարց տվեց Մարուքյանը:
Ընդ որում՝ խորհրդարանականը նշեց, որ երկրի անկախությունը որոշվում է լեզվի կարգավիճակով՝ որպես օրինակ բերելով Շվեյցարիան, որտեղ կա պետական 4 լեզու:
