Ադրբեջանի վարչապետ Ալի Ասադովը պաշտոնական այցով մեկնել է Թուրքիա, հայտնում է թուրքական Anadolu լրատվական գործակալությունը:

«Այցը տեղի է ունենում Թուրքիայի փոխնախագահ Ֆուաթ Օքթայի հրավերով: Փետրվարի 18-ին այցի շրջանակներում Ասադովը հանդիպում կունենա Օքթայի հետ, այնուհետև նրան կընդունի Թուրքիայի նախագահ Ռեջեփ Թայիփ Էրդողանը»,- նշում է թերթը:

Բացի այդ, Ասադովը և Օքթայը կմասնակցեն փետրվարի 19-ին կայանալիք տնտեսական համագործակցության թուրք-ադրբեջանական միջկառավարական հանձնաժողովի 9-րդ նիստին:

«Հանդիպմանն ընդառաջ կկայանա թուրք-ադրբեջանական գործարար համաժողովը, որին կմասնակցի երկու երկրների մասնավոր հատվածի 150 ներկայացուցիչ: Օքթայի և Ասադովի, այնուհետև պատվիրակությունների կազմով բանակցություններից հետո Թուրքիայի նախագահի նստավայրում երկու երկրների միջև համաձայնագրեր կստորագրվեն», - ասվում է հաղորդագրությունում:

Միևնույն ժամանակ, Anadolu-ն, վկայակոչելով նախագահի աշխատակազմի սեփական իրազեկ աղբյուրներին, հայտնում է, որ պետական և մասնավոր հատվածներում երկու երկրների միջև առևտրային համաձայնագրերի ընդհանուր արժողությունը կարող է գերազանցել 100 միլիոն ԱՄՆ դոլարը: