Աշխարհում մինչ օրս կորոնավիրուսով հիվանդացած մարդկանց թիվը գերազանցել է 110 միլիոնը։ Հիվանդությունը 2.441.044 մարդու կյանք է խլել։ 85 միլիոնից ավելի մարդ առողջացել է։ Այս մասին են վկայում Worldometers կայքի տվյալները։

Հիվանդների և վիրուսից մահացածների թվով առաջին հորիզոնականում է ԱՄՆ-ն։ Այնտեղ COVID-19-ով հիվանդացել է գրեթե 28,5 միլիոն մարդ, իսկ մահացածների թիվը գերազանցել է 500.000-ը։ ԱՄՆ-ին հաջորդում են Հնդկաստանը (10.950.201), Բրազիլիան (9.979.276), Ռուսաստանը (4.112.151) և Մեծ Բրիտանիան (4.071.185)։

Մեր հարևան երկրներից Թուրքիան գտնվում է 9-րդ հորիզոնականում։ Այնտեղ մինչ օրս կորոնավիրուս է հաստատվել 2.609.359 մարդու մոտ։ Վիրուսից մահացածների թիվը 27,738 է։

Իրանում Քովիդ-19-ով հիվանդացել է 1,5 միլիոն մարդ, 59.184 մարդ մահացել է։

Վրաստանում առ այսօր հաստատվել է կորոնավիրուսի 266.948 դեպք, որոնցից 3390-ը՝ մահվան ելքով։

Ադրբեջանում հիվանդացել է 232.491 մարդ, որոնցից մահացել է 3187-ը։