Ադրբեջանը սյունեցիներին հոգեբանորեն ճնշելու խնդիր է դրել. ԱԺ պատգամավորն ահազանգում է՝ պարբերաբար հնչում են կրակոցներ
Սյունիքի ուղղությամբ կրակոցներ պարբերաբար հնչում են: Սա անվտանգության ֆիզիկական սպառնալիք է,Ադրբեջանը հոգեբանորեն ճնշելու լուրջ խնդիր է դրել: Այս մասին «Փաստինֆո»-ի հետ զրույցում ասաց ԱԺ անկախ պատգամավոր Աննա Գրիրգորյանը.
«GPS-ով ադրբեջանցիները գալիս են և ասում, որ սա է մեր սահմանը, սակայն չկա բանակցող կամ հակադարձող , ցանկացած հողակտոր, որ GPS-ով ցույց է տալիս, պետք է անցնի Ադրբեջանին, իրականություն է դառնում»,-ասաց սյունեցի պատգամավորը:
Աննա Գրիգորյանը նաև կարևորեց սահմանապահների քանակի ավելացումը.
«Լրիվ նոր անվտանգային ճարտարապետություն պետք է գծվի, որովհետև անմիջապես 200 մ հեռավորության վրա գտնվող ադրբեջանցուց պաշտպանվելը չգիտեմ՝ ինչպես է հնարավոր: Պետք է լրիվ նոր մեխանիզմներ առաջարկվեն»,-ասաց պատգամավորը:
Անդրադառնալով նաև մամուլում տարածված տեղեկություններին, որ Ադրբեջանի և Հայաստանի միջև երրորդ համաձայնագիրն է ստորագրվել՝պատգամավորն արձագանքեց.
«Դա հուշագիր է, որ նորից բոլորիս մեջքի հետևում կնքվեց: Այս հուշագրի առկայությունն է, որ թույլ չի տալիս Սյունիքն անվտանգ համարել»
Պատգամավորը արձանագրում է, որ այս հուշագիրը սպառնալիք ՀՀ տարածքային ամբողջականության համար.
«Իշխանությունը փորձում է սա կեղծ փաստաթուղթ որակել, բայց բոլոր կետերն արդեն իսկ իրականացվել են»,-ասաց Աննա Գրիգորյանը:
Մանրամասները՝ տեսանյութում։