ԱԺ նախկին փոխխոսնակ Էդուարդ Շարմազանովը վստահ է՝ ժողովուրդը լավ գիտի՝ Նիկոլ Փաշինյանը կապիտուլյանտ է ու հողատու, նա շանս չունի ՀՀ-ում իշխանության մնալու։

«Վաղը կլինի, վաղը չէ, մյուս օրը, թե մեկ շաբաթից․․․․ դա չեմ կարող ասել, բայց որ նա այլևս ո՛չ քաղաքական, ո՛չ բարոյական որևէ շանս չունի իշխանության մնալու, դա ակնհայտ է։ Նա քաղաքական դիակ է․ դա վիրավորանք չէ, փաստի արձանագրում է», — MegaNews.am-ի հետ զրույցում նշեց Էդուարդ Շարմազանովը։

ՀՀԿ խոսնակը հիշեցրեց՝ Փաշինյանն ասել է՝ դժգոհության ալիքը մարել է, ապա հավելեց․ «Վաղը կտեսնենք՝ մարե՞լ է, թե՞ ոչ»։

Հարցին՝ եթե հանրահավաքների կամ ակցիաների միջոցով հնարավոր չլինի այս իշխանությանը հեռացնել․․․, Շարմազանովը միանգամից պատասխանեց․ «Կհեռանան, խելոք են, կհեռանան»։

Անդրադառնալով Շուշիի անկման, մասնավորապես՝ Շուշին հանձնելու վարկածին, որի մասին իր վերջին հարցազրույցում նշել էր երկրորդ նախագահ Սերժ Սարգսյանը, և այդ վարկածը MegaNews.am-ի հետ հարցազրույցում հաստատել է նաև Սեյրան Օհանյանը, Շարմազանովը հիշեցրեց՝ Սերժ Սարգսյանը եղել է գերագույն գլխավոր հրամանատար, իսկ Սեյրան Օհանյանը՝ պաշտպանության նախարար, ԶՈՒ Գլխավոր շտաբի պետ, նրանք երկուսն էլ Արցախի հերոս են, պատերազմի բովում թրծված, հետևաբար՝ ասվածը կասկածի տակ չի դրվում։

«Ես ռազմական գործի գիտակ չեմ։ Մովսես Հակոբյանն էլ է ասել՝ Սերժ Սարգսյանի ներկայացրած փաստերն իրականություն են։ Ես երբեք Սերժ Սարգսյանի որևէ խոսքի հետ կապված՝ կասկած չեմ ունեցել։ Այստեղ էլ որևէ խնդիր չկա, ամեն ինչ ակնհայտ է։ Եվ կարող եմ ասել՝ ինչո՞ւ միայն Շուշին․․․․ Երբ նա (նկատի ունի Նիկոլ Փաշինյանին- հեղ․) արտախորհրդարանական ուժերին հավաքում էր ու ասում էր, որ վիճակը վատ է, հաջողության շանս չունենք, բանակը գլխատվում է, այդ երեխեքին էլի՛ ուղարկում էր զոհվելու։ Երբ Ռուսաստանն իրեն ասում էր՝ կա՛նգ առ, պատերազմը կանգնեցրո՛ւ, դա ի՞նչ էր։

Եթե նոյեմբերի 9-ին Շուշին արդեն մերը չի եղել, ինքը նոյեմբերի 9-ին ասում էր՝ Շուշիի համար մարտերը շարունակվում են․․․․ Ես չեմ ուզում ռազմական գործերի մեջ մտնել․ ի տարբերություն Նիկոլի՝ ես ինձ երբեք մարշալ Ժուկովի տեղը չեմ պատկերացրել։ Ես քաղաքական ու դիվանագիտական գործընթացների մասին եմ ասում․ այս մարդը կա՛մ դավադիր դավաճան է, կա՛մ անմեղսունակ․ հիմա թո՛ղ այս երկուսից մեկն ինքը ընտրի։ Այս կապիտուլյացիան, այս պարտությունը կա՛մ դավադրության կա՛մ անմեղսունակության արդյունք է, բայց նույնիսկ անմեղսունակության դեպքում հարյուր քայլից մեկը ճիշտ է դուրս գալիս, իսկ այս մարդու բոլոր հարյուր քայլերը եղել են հակահայկական ու հակապետական․ հետևությունը թողնում եմ ձեզ», — ասաց Շարմազանովը։

Նրա պնդմամբ՝ ակնհայտ է՝ Նիկոլ Փաշինյանը համաժողովրդական աջակցություն չունի։

«Դրա վառ ապացույցն այն ողորմելի շոուներն են, որոնք եղան Գյումրիում։ Հիշե՛ք՝ երեք տարի առաջ ինչպիսին էր այդ աջակցությունն ու ինչպիսին է այսօր։ Այսօր ամեն ճանապարհի վրա 10-15 հոգի կանգնացնում են, գալիս, անցնում են․․․ Կամ սրան ինչո՞ւ պիտի աջակցեն՝ բացի իր նեղ շրջապատից, այն խունտայից, որոնք ունեն անձնական շահագրգռվածություններ՝ մեկը պարգևավճար է ստանում, մյուսը մի ուրիշ բան», — հավելեց ԱԺ նախկին փոխխոսնակը։

Շարմազանովը շեշտեց՝ հինգ հազար մարդու զոհվելու պատճառ դարձած, հայրենիքի այդքան մասը թուրքին հանձնած, Ալիևի առաջ նսեմացած, Շուշին թուրքին տված, Շուռնուխը, Որոտանը, Սոթքը թուրքին տված, (հիմա էլ Դավիթ Բեկի մասին է խոսվում), մեր զինվորների գերեվարման ու անհետ կորելու պատճառ դարձած, իր որևէ խոստում չկատարած մարդուն ինչո՞ւ պիտի ժողովուրդը սատարի։

«Նրա օրերը հաշված են։ Նա քաղաքական դիակ է։ Նապոլեոնը մի ֆանտաստիկ խոսք ունի, ասում է՝ հնարավոր է կանգ առնել վերելքի ժամանակ, բայց գահավիժման ժամանակ անհնար է կանգ առնել։ Նիկոլը հիմա ազատ անկման մեջ է, նա գնում է դեպի անդունդ, արգելակները չեն աշխատում, արգելակներ չկան․ սա է փաստը։ Յուրաքանչյուր քաղաքացի պետք է հասկանա, որ սա ազգային խնդիր է, ազգային անվտանգության խնդիր։ Այդ մարդը մեր երեսուն տարվա երազանքը, մեր հաղթանակը մսխել է։ Մի ամբողջ սերունդ, 5 հազար երեխա է զոհվել իր ապուշ քաղաքականության պատճառով․ դրա պատասխանն ո՞վ պիտի տա։ Երբ որ պատերազմից առնվազն մի քանի օր հետո հնարավորություն է եղել պատերազմը կանգնեցնելու, ինչո՞ւ չի արել, դե, տղա է, թո՛ղ կանգնի, ասի՝ Պուտինը սուտ է ասում, բա ինչո՞ւ չի ասում», — եզրափակեց Շարմազանովը։

 

Հասմիկ Բալեյան