Այս պահին ԱԱԾ շենքի առջև է «Հայրենիք» կուսակցության խորհրդի անդամ Արսեն Բաբայանը։ Կան քաղաքացիներ, որոնք հավաքվել են այնտեղ՝ այսօր բերման ենթարկված քաղաքացիներին աջակցելու համար։

Հիշեցնենք՝ Ազգային ժողովի աշխատակազմի նախկին ղեկավար Արա Սաղաթելյանը, քաղաքական վերլուծաբան, «Քառյակ մեդիայի» համահիմնադիր Կարեն Բեքարյանը և քաղաքացի Մհեր Ավագյանը ձերբակալվել են։ Սաղաթելյանի փաստաբան Հակոբ Ենոքյանն արդեն հայտնել է՝ Սաղաթելյանին և Բեքարյանին մեղադրանք է առաջադրվել երեք հոդվածով, Ավագյանին՝ մեկ։ Մասնավորապես, նրանք մեղադրվում են ազգային, ռասայական կամ կրոնական թշնամանք հարուցելու համար, ռազմական դրության ժամանակ տեղեկատվության տարածման կանոնները խախտելու համար։ Արսեն Բաբայանը Meganews.am-ի հետ զրույցում մանրամասնեց՝ մեղադրանքը կապվում է ֆեյք օգտագիրոջ հետ։

«Ռազմական դրության ժամանակ ֆեյք օգտագիրոջ կողմից հրապարակվել է մի տեղեկատվություն, որն արգելված է եղել, մյուս հոդվածով՝ ատելության քաջոզի մեղադրանք է, երրորդ հոդվածով՝ բռնության կոչերի մեղադրանքով․ այսինքն՝ նրանք կասկածվում են ֆեյք լինելու մեջ», - նշեց Արսեն Բաբայանը։

Նա հավելեց, որ ադրբեջանագետ Անժելա Էլիբեգովային էլ այսօր որպես վկա էին կանչել հարցաքննության։

Հարցին՝ այս պային ԱԱԾ-ի դիմաց ձերբակալվածներին աջակցող քաղաքացիների թիվն ավելանո՞ւմ է, թե՞ ոչ, Արսեն Բաբայանը պատասխանեց․ «Քանի որ տվյալ երեք անձանց ձերբակալել են, փաստաբանը ԱԱԾ-ի դիմաց գտնվող քաղաքացիներին կոչ արեց, որպեսզի գնան տուն, այս ցրտին չսպասեն, և բոլորը կամաց-կամաց հեռանում են»։

Արսեն Բաբայանը նշեց՝ նմանատիպ գործողություններով այս իշխանությունը փորձում է վախի մթնոլորտ ձրավորել՝ վաղվա հանրահավաքին ընդառաջ։

«Այս իշխանությունն այդպես էլ չհասկացավ, որ հնարավոր չէ Նիկոլ Փաշինյանի հրաժարականը պահանջող ժողովրդին այս ծիծաղելի գործողություններով վախեցնել», — նշեց Արսեն Բաբայանը։

Նա հավելեց՝ երբ խոսքն այս իշխանության մասին է, ապա ամեն աննորմալ բան կարող է հավանական լինել։

«Ամեն ինչ հնարավոր է։ Հնարավոր է նաև այն, ինչը մեր մտքով էլ չի կարող անցնել։ Գիշերն էլ կարող են մարդկանց բռնել, վաղն էլ։ Այստեղ չկա տրամաբանություն։ Տրամաբանությունից զուրկ իշխանություն է։ Բայց, այս ամենը, միանշանակ, չի կարող վախի մթնոլորտ ձևավորել։ ԱԱԾ-ի դիմած հավաքված մարդիկ ծիծաղուկմ էին այս թուրք իշխանության վրա», — եզրափակեց Արսեն Բաբայանը։