Մենք խաբվեցինք, եթե դուք կարդայիք, թե ինչ էին ասում այդ մարդիկ նախորդ տարիներին, երբեք այդ ճանապարհով չէիք գնա: Մենք 2,5-3 տարի հետո ունենք ողբերգություն, կորցրեցինք գրեթե ամեն ինչ, պարտվեցինք պատերազմում, բանակը ջարդվեց, պետությունն անկախ չէ, մեր ռազմական բոլոր հաղթանակները ոչնչացան, մեր անվտանգությունն ապահովում է Ռուսաստանը, մենք դառնում ենք լրիվ կախյալ Ռուսաստանից: Այս մասին Ազատության հրապարակում հայտարարեց Վազգեն Մանուկյանը:

«Սրանք մտածում էին, որ Ռուսաստան գնալով, Պուտինին քծնելով, տակից իրենց գործն անելն ընկերություն է: Դա նույնիսկ դպրոցում չէր անցնում, բակի խաղերում չէր անցնում: Փչացվեց ամեն ինչ: Փորձեցին ազգայինը դուրս շպրտել մեր մեջից»,-ասաց նա:

Մանուկյանն ասաց, որ Հայաստանը դառնում է ոստիկանական պետություն, փակում են թղթակիցների բերանը, ձերբակալում եմ ամենաազնիվ, նվիրական մարդկանց. «Երբ ես իմացա, որ Կարեն Բեքարյանին ձերբակալել են, ցնցվեցի: Մենք այսպիսի պետությունո՞ւմ ենք ուզում ապրել»,-ասաց նա: