Boeing ավիաընկերությունը բոլոր ավիաուղիներին խորհուրդ է տվել դադարեցնել Pratt & Whitney PW 4000 շարժիչներով Boeing 777 շարքի ինքնաթիռի թռիչքները։ Այս մասին հաղորդում է TASS գործակալությունը։ Սա կապված է փետրվարի 21-ին United Airlines ամերիկյան ավիաընկերության Boeing 777 ինքնաթիռի հետ տեղի ունեցած միջադեպի հետ։

ԱՄՆ Դենվեր քաղաքից Հոնոլուլու մեկնող ինքնաթիռի շարժիչը թռիչքի ժամանակ բռնկվել էր։ Ինքնաթիռն ապահով վերադարձել էր օդանավակայան, սակայն դրա բեկորներն ընկել էին բնակելի տների մոտակայքում։

«Boeing-ն ակտիվորեն հետևում է վերջին իրադարձություններին՝ կապված United Airlines ավիաընկերության 328 թռիչքի հետ։ ԱՄՆ-ի Փոխադրամիջոցների անվտանգության պետական խորհրդի (NTSB) կողմից անցկացվող հետաքննության ընթացքում խորհուրդ ենք տալիս դադարեցնել շահագործվող 69 և պահեստում գտնվող 59 Boeing 777-երի թռիչքները, որոնք ունեն Pratt & Whitney PW 4000 շարժիչ», – նշվում է ընկերության տարածած հաղորդագրությունում։

 

Ընկերությունը նաև լիակատար աջակցություն է հայտնել Ճապոնիայի և ԱՄՆ-ի ավիակարգավորող մարմինների որոշմանը՝ տվյալ ինքնաթիռների թռիչքները դադարեցնելու մասին։