«Ազատության» եթերում  իմքայլական պատգամավոր Անդրանիկ Քոչարյանը, մեկնաբանելով Վազգեն Մանուկյանի հայտարարությունը, թե պետք է ամեն վայրկյան պատրաստ լինել կայծակնային արագությամբ ապստամբելով վերցնել իշխանությունը, նշել է․ «Բոլորը պետք է գիտակցեն, որ անվտանգության համակարգի հետ կատակներ չեն անում: Մեր երկիրն այն վիճակում չէ, որ չկարողանա պաշտպանել իր քաղաքացուն ու իր պետականությունը: Եթե մտածում են շենքեր գրավելուց, թող մտածեն, որ շենքերը նաև գտնվում են պետական պահպանության տակ, իսկ դա նշանակում է, որ պետությունը մոնոպոլ իրավունք ունի կրակելու»։

Անդրադառնալով Անդրանիկ Քոչայնանի վերոնշյալ  ձևակերպումներին,  ԱԺ «Բարգավաճ Հայաստան» խմբակցության քարտուղար Արման Աբովյանը MegaNews.am-ի հետ զրույցում նշեց․ «Իշխանությանը հիշեցնեմ, որ պետության առաջին առաքելությունը ոչ թե հիշեցնելն է, որ պետությունը կրակելու իրավունք ունի, այլ հիշեցնել, որ  պետությունը պարտավոր է ապահովլ քաղաքացների անվտանգությունը, իսկ մենք տեսնում ենք, որ արցախյան պատերազմից հետո պետությունը չի կարողանում անվտանգությունն ապահովել։ Խրհուրդ կտամ, որ Սյունիք գնան, տեսնեն՝ հայկական ճանապարհներին ովքեր են կանգնած․ խոսքս ադրբեջանցիների, ադրբեջանական բանակի մասին է։ Իսկ ինչ վերաբերում է իր արտահայտությանը, ապա հիշեցնեմ, որ  ՀՀ Սահմանադրությամբ շատ հստակ ու պարզ ամրագրված է, որ ՀՀ  քաղաքացիներն իրավունք ունեն արտահայտել իրենց անհնազանդությունը և անհամաձայնությունն՝ իշխանության կողմից վարվող քաղաքականության հետ կապված»։

Արման Աբովյանն ընդգծեց՝ իր համար շատ զարմանալի է, որ արդեն այս կարգի արտահայտություններ  են հնչում։ Պատգամավորը հիշեցրեց՝ որևէ մեկն իրավասու չէ խոչընդոտել  ՀՀ քաղաքացիների բողոքն ու ընդվզումը։

«Ոչ մի պետական այր իրավունք չունի որոշակի սպառնալիքներ  ուղղել ՀՀ քաղաքացիերին։ Ոչ ոք ՀՀ քաղաքացիների հետ սպառնալիքի լեզվով խոսելու իրավունք չունի։ Մեր  քաղաքական ուժի մասով կարող եմ ասել՝ մենք միշտ հանդես ենք եկել ու այժմ էլ հանդես ենք գալիս  այն հստակ ու պարզ դիրքորոշմամբ, որ ոչ մի դեպքում չի կարելի թույլ տալ, որ երկրում  լինեն ցնցումներ, ու ստեղծվի  այնպիսի իրավիճակ, որը երկիրը կտանի դեպի ոչ ցանկալի զարգացումներ։  Սա նշանակում է, որ իշխանությունները պիտի հասկանսն,  որ ՀՀ քաղաքացիներն ունեն իրավունք՝ Սահմանադրության ու օրենքի շրջանակում յուրաքանչյուր  բողոք և  ակցիա իրականացնելու», — նշեց Արման Աբովյանը։

MegaNews-ի հարցին՝ իսկ ինչպե՞ս կմեկնաբանեք այս օրերին տեղի ունեցող ձերբակալությունները, մասնավորապես՝  ֆեյք էջերով հրապարակումներ անելու մասով՝ Արա Սաղաթելյանի, Կարեն Բեքարյանի և մի շարք այլ անձանց հետ կապված իրավական գործընթացները, Արման Աբովյանը պատասխանեց․ «Շատ ցավալի ու զավեշտալի իրավիճակ է։ Խորհուրդ կտամ, որ  սկզբում իրենց ֆեյքերին մաքրեն, այլ ոչ թե ֆեյքերի մասով՝ փորձեն նման քայլեր անել։
Մենք հասել ենք այնպիսի զավեշտալի  իրավիճակի, որ փաստացի ստացվում է՝ յուրաքանչյուր ֆեյքի համար  ՀՀ քաղաքացուն կարող են  կասկածանքով բերմա՞ն ենթարկել․ փաստորեն, այդպես է ստացվում։ Բոլոր կարևոր գործերը թողած՝ ֆեյքի ետևից են ընկել։ Սա ևս մեկ անգամ ապացուցում է, որ իշխանությունը ադեկվատից դուրս է»։

Հասմիկ Սարգսյան