«Իմ քայլը» խմբակցության պատգամավոր Անդրանիկ Քոչարյանը հայտարարել է` եթե քաղաքացիները մտածում են, որ շենքերը պետք է գրավեն, ապա պետք է մտածեն, որ պետությունն իրավունք ունի կրակելու:

Անկախ-ի հետ զրույցում իրավապաշտպան, Մարդու իրավունքների առաջին պաշտպան Լարիսա Ալավերդյանն ասաց, որ Վազգեն Մանուկյանի հայտարարություները՝ իշխանությունը կայծակնային վերցնելու հետ կապված, ամենևին չի  նշանակում, որ դա պետք է տեղի ունենա ուժի գործադրմամբ:

«Ապստամբությունն էլ չի ենթադրում պարտադիր զինված հարձակում և բռնություն,-ասաց նա,-եթե ժողովուրդը զինված չէ, իշխանությունն իրավունք չունի զենք բարձրացնելու»:

Ինչ վերաբերում է իշխանությունների կողմից ժողովրդի վրա կրակելու պատրաստակամությանը, իրավապաշտպանն ասաց, որ այս իշխանությունն ուզում է իրականացնել սահմանադրական կարգի տապալում, և ժողովուրդը պետք է պատրաստ լինի ամենավատ սցենարներին:

«Այս իշխանությունը պատրաստ է կրակել ժողովրդի վրա: Իրենք իրենց ոչ բոլոր գործիքակազմն են օգտագործել հայ ժողովրդի դեմ: Ժողովուրդը պետք է պատրաստ լինի ցանկացած զարգացումների, ցանկացած սադրանքի: Նրանք ճիշտ Ադրբեջանի ձեռագրով են աշխատում. ինչպես Ադրբեջանն է Հայաստանի վրա հարձակումը հիմնավորում այն թեզով, թե իբր իրենք ոչ թե հարձակվել են, այլ հակահարված տվել, այս իշխանությունն էլ կարող է ժողովրդի վրա կրակելը ներկայացնել իբրև հակահարված և պաշտպանություն»:

Լարիսա Ալավերդյանի խոսքով՝ եթե իմքայլականները դեռ չեն հասկացել, որ ճիշտ ժամանակն է խաղաղ ճանապարհով հրաժարվել իշխանությունից, ապա դա նշանակում է, որ նրանք հավանաբար Ադրբեջանի և Թուրքիայի կողմից դեռևս ունեն չիրականացրած առաջադրանքներ:

«Բայց ճապոնական մի ասացվածք կա. «Անգամ ամենաերկար ձմեռվանից հետո գալիս է գարուն»: Ինչքան ձգեն այս լեգիտիմությունը կորցրած իշխանությունը, այնքան ավելի ծանր է լինելու նրանց պատասխանատվությունն օրենքի առաջ: Թող մտածեն իրենց պատասխանատվության մասին»:

Իրավապաշտպանը հիշում է 2018 թ. գարնանը ցուցարարների կողմից Ռադիոտունը զավթելու ակցիան ու իմքայլականներին հիշեցնում՝ այն ժամանակ ոստիկանությունը չկրակեց:

«Դա նշանակում է, որ ոստիկանությունը, նույնիսկ իրավունք ունենալու դեպքում, միշտ չէ, որ կրակում է»,-եզրափակեց Ալավերդյանը:

Լարիսա Ալավերդյանանդրանիկ Քոչարյանապստամբություն Վազգեն Մանուկյանխմբագրի ընտրանի