44-օրյա պատերազմից հետո Հարավային Կովկասում տեղի է ունենում թե՛ տարածաշրջանային, թե՛ խոշոր դերակատարների, ուժերի, ազդեցությունների վերադասավորում։ Այս մասին Ազգային ժողովում ՀՀ ԱԺ տարածաշրջանային և եվրասիական ինտեգրման հարցերի մշտական հանձնաժողովի նիստին ասաց արտաքին գործերի նախարար Արա Այվազյանը։

«Այս գործընթացը դեռևս ամբողջովին չի բյուրեղացել, դեռևս վաղ է ամբողջական գնահատական տալ հաստատվող իրողություններին և մարտահրավերներին»,–ասաց նա և նկատեց, որ հրադադարի պահպանման, անվտանգային հարցերում առանցքային դերակատարություն է ստանձնել ՌԴ-ն, սակայն ակնհայտորեն ավելացել են Թուրքիայի հավակնությունները տարածաշրջանում։

«Մենք հանձնառու ենք կարգավորման գործընթացի վերսկսմանը, սակայն նախևառաջ պետք է ձևավորվի խաղաղությանը նպաստող միջավայր, իսկ դրա նախադրյալները ադրբեջանական կողմից դեռևս նկատելի չեն։ Տարածաշրջանում ակնկալում ենք տեսնել ուժեղ համանախագահություն, որը առաջին հերթին կկարողանա ապահովել իր մանդատի բովանդակությունը, մասնավորապես՝ խաղաղ գործընթացի առաջմղումը»,-ասաց նա։

Անդրադառնալով ԵԱՏՄ-ին՝ Արա Այվազյանը նշեց, որ 2020 թվականի արդյունքներով ԵԱՏՄ-ում ապրանքաշրջանառությունը կրճատվել է 11 տոկոսով՝ կազմելով 44 միլիարդ ԱՄՆ դոլար, և կան կանխատեսումներ, որ ընթացիկ տարվա ավարտին միության տնտեսությունը կկրճատվի ևս 3,9 տոկոսով։

«Միևնույն ժամանակ ԵԱՏՄ երկրների հետ Հայաստանի առևտրաշրջանառությունը 2020 թվականի նույն ժամանակահատվածում կրճատվել է ընդամենը 2 տոկոսով»,–ասաց նա։