Նախապես հայտարարված ժամը 16-ից մի փոքր ուշ Նիկոլ Փաշինյանը դուրս է եկել կառավարության շենքից և մոտեցել Հանրապետության Հրապարակում արդեն տեղադրված հարթակին: Խոսքը սկսելուց առաջ, Փաշինյանի առաջարկով, ներկաները մեկ րոպե լռությամբ հարգել են զոհված զինծառայողների հիշատակը: Ելույթը տևել է ավելի քան երեսուն րոպե Իր խոսքում Փաշինյանը դարձյալ սեղմ ներկայացրել է ստեղծված իրավիճակը, դարձյալ շեշտելով, որ իր հրաժարականը պահանջող զինվորականների մեծ մասը վերադասի հրաման են կատարել և այս ամենը բնորոշել է որպես ռազմական հեղաշրջման փորձ: Նա կոչ է արել ՀՀ նախագահ Արմեն Սարգսյանին ստորագրել Գլխավոր շտաբի պետ Օնիկ Գասպարյանի ազատման իր առաջարկությունը և նրան ազատել աշխատանքից:

Միևնույն ժամանակ, որպես այլընտրանքային լուծում Փաշինյանն առաջարկել է, որ հենց Օնիկ Գասպարյանն ինքը հրաժարական տա:Ելույթի ընթացքում նա անդրադարձել է նաև իր և Օնիկ Գասպարյանի հարաբերություններին պատերազմի ընթացքում, նշելով, որ ինքը բարձր վստահությամբ է վերաբերվել գեներալին: Խոսելով ստեղծված իրավիճակի հանգուցալուծման մասին նա դարձյալ պնդել է, որ լուծումը եղբայրական մոտեցման և հանդարտության մեջ է, սակայն նա հայտարարել է, որ այս անգամ արդեն վերջնականապես վերջ է տրվելու թավիշին: Վարչապետը կոչ է արել Հայաստանի Հանրապետության Ազգային անվտանգության ծառայությանը և ոստիկանությանը երկրում ապահովել օրինականությունն ու թույլ չտալ հակաիրավական գործողություններ: