ԳՇ-ն իր վերջնական խոսքն ասաց, ես էլ եմ զինվորական և այսօր ԳՇ-ի հետ ժողովրդի կողքին ենք: Այս մասին այսօր Նիկոլ Փաշինյանի հրաժարականի և բանակին աջակցելու ակցիայի ժամանակ Բաղրամյան պողոտայում լրագրողների հետ զրույցում  ասաց ՀՀ ոստիկանության զորքերի նախկին հրամանատար, ոստիկանության պետի նախկին տեղակալ, գեներալ-լեյտենանտ Լևոն Երանոսյանը:

Լևոն Երանոսյանը չցանկացավ պատասխանել այն հարցերին, որտեղ հնչում է Նիկոլ Փաշինյանի անունը՝ նշելով, որ նման անունով մարդ չի ճանաչում: «Ես նման մարդ չեմ ճանաչում, նման մարդու խոսքն էլ ինձ համար խոսք չէ»:

Անդրադառնալով իմքայլական պատգամավոր Անդրանիկ Քոչարյանի այն հայտարարությանը, թե եթե փորձ կատարվի շենքեր գրավելու, ապա նրանք կարող են կրակել, Երանոսյանը արձագանքեց՝ «Ո՞վ կրակի, Անդրանիկ Քոչարյանը պարզապես կապիկ է ու թող մեկը փորձի ձենք ուղղել ժողովրդի վրա, մենք տեսել ենք այդ զենքը, թող զենքով մեզ չվախեցնեն: Բանակը ժողովրդինն է, թող ոչ ոք չփորձի խաղի մեջ մտնել»:

Դիտարկմանը, թե կան կարծիքներ, որ Երանոսյանը ժամանակին նույնպես կոշտ միջոցներ է ձեռնարկել քաղաքացիների անհնազանդությունը զսպելու համար, վերջինս պատասխանեց՝ երբևէ ներքին զորքերը կոշտ միջոցներ չեն ձեռնարկել.«Ես չեմ թողել, որ արյունահեղություն լինի, մարդիկ դրան էին տանում, իսկ ես չէի թողնում: Ո՞վ տարավ բախման, դուք լավ գիտեք, չե՞ք հիշում, միասին ենք եղել: 2016-ին Սարի թաղում էլ էին գնում արյունահեղության, մեր շնորհիվ  չեղավ դա ու էսօր էլ ոչ ոք չփորձի դրան տանել»:

Նա նշեց, որ այսօր ժողովրդի հետ է, որտեղ բանակը, այնտեղ էլ ինքը, և նրա համար ծիծաղել է, երբ որոշները ասում են՝ զենք են ուղղելու ժողովրդի դեմ: «Թող մարդիկ, նույն ինքը՝ Քոչարյանը, զենքին տիրապետեն, հետո նոր զենքից խոսեն»:

Մանրամասները՝ տեսանյութում։