«Իսկանդեր» հրթիռային համակարգերից ոչ մեկը չի օգտագործվել Լեռնային Ղարաբաղի հակամարտության ընթացքում: ТАСС լրատվական գործակալության փոխանցմամբ՝ այս մասին լրագրողներին հայտնել են Ռուսաստանի Պաշտպանության նախարարությունից:

«Ըստ մեր օբյեկտիվ և հավաստի տվյալների, որոնք հաստատվել են նաև օբյեկտիվ վերահսկողության համակարգով, Լեռնային Ղարաբաղի հակամարտության ընթացքում տվյալ տեսակի հրթիռային համակարգերից ոչ մեկը չի օգտագործվել»,- նշել են ռազմական գերատեսչությունում:

Ինչպես ընդգծել է Ռուսաստանի պաշտպանության նախարարությունը, հրթիռների զինամթերքի ամբողջ պաշարը գտնվում է Հայաստանի զինված ուժերի պահեստներում: Ռազմական գերատեսչությունում նշել են, որ «տարակուսանքով և զարմանքով» են ծանոթացել Փաշինյանի այն հայտարարության հետ, որ «Հայաստանի զինված ուժերի կողմից Լեռնային Ղարաբաղում օգտագործված «Իսկանդեր» հրթիռները չեն պայթել կամ պայթել են միայն 10% -ով»:

«Ըստ ամենայնի, ՀՀ վարչապետ պարոն Նիկոլ Փաշինյանին մոլորության մեջ են գցել, որի արդյունքում նա օգտագործել է ոչ ճշգրիտ տեղեկատվություն»,- ընդգծել են նախարարությունում:

ՌԴ ՊՆ-ն հիշեցրել է, որ 9K720-Э («Իսկանդեր-Է») օպերատիվ-մարտավարական հրթիռային համակարգը փորձարկվել և բազմիցս հաջողությամբ օգտագործվել է Սիրիայում մարտական պայմաններում՝ միջազգային ահաբեկչական խմբավորումների դեմ:

«Դա մեզ լիարժեք հիմք է տալիս պնդելու, որ Ռուսաստանում արտադրված 9K720-Э «Իսկանդեր-Է» հրթիռային համակարգն իր դասում աշխարհում ամենալավն է: Դա ընդունում են բոլորը», – եզրափակել է Պաշտպանության նախարարությունը: