Վարչապետ Նիկոլ Փաշինյանը կամաց-կամաց կորցնում է իր հենարանները, և ես հույս ունեմ՝ մոտակա ժամանակահատվածում ԱԱԾ-ն և Ոստիկանությունը ևս կմիանան շարժմանը և երես կթեքեն նրանից: Այս մասին  Բաղրամյան պողոտայում իրականացվող ակցիայի ժամանակ ասաց «Հայրենիքի փրկության շարժման» վարչապետի թեկնածու Վազգեն Մանուկյանը:

«Փաշինյանը կորցնում է հենարաններ՝ եկեղեցի, բանակ, նախագահը իր հետ չէ, և հույս ունեմ՝ հերթը կհասնի Ոստիկանությանը և ԱԱԾ-ին: Ցանկացած երկրում, երբ իշխանություն է փոխվում, երբեք չի լինում, որ 100%-ը կողմ է լինում իշխանափոխությանը: Հայաստանում 80 %-ն առնվազն դեմ է իշխանությանը, և մի զգալի մասը նաև պահանջում է նրա հրաժարականը»,- ասաց Վազգեն Մանուկյանը:

Նա նաև անդրադարձ կատարեց ԶՈՒ գլխավոր շտաբի պետ Օնիկ Գասպարյանի հրաժարականի հարցին, որը, ըստ Մանուկյանի, անօրինական է:

«Նիկոլ Փաշինյանն անօրինական ձևով ուզում է հանել Օնիկ Գասպարյանին, ինչը հակասում է Սահմանադրությանը և օրենքներին, իսկ դա իրավիճակի սրում է, և առհասարակ Փաշինյանը միշտ իրավիճակը սրում է»,- մեկնաբանեց Վազգեն Մանուկյանը:

Նա նաև մեկնաբանեց այսօրվա ԱԺ-ի արտահերթ նիստը, որը տեղի չունեցավ, այն  նախաձեռնել էին «Բարգավաճ Հայաստան», «Լուսավոր Հայաստան» խմբակցությունները:

«Արհեստական կերպով քվորում չեն ապահովել, և նիստը տեղի չի ունեցել, եթե ժողովրդի ճնշումը մեծ լինի, նրանք ստիպված կլինեն արձագանքել»,- մեկնաբանեց նա:

Վազգեն Մանուկյանը տեղեկացրեց, որ եթե չիրագործվի առաջին նախագիծը, կլինի 2-րդը, որը պետք է իրականացնի ժողովուրդը:

«Ես կարծում եմ՝ մեր առաջին նախագիծն իրեն արդարացնում է, գրեթե չի մնացել գոնե մեկ ինստիտուտ, որը չպահանջի Նիկոլ Փաշինյանի հրաժարականը, այսինքն` նա կորցնում է իր հենարանները: Երկրորդ նախագիծը ոչ թե մենք ենք իրականացնելու, այլ ժողովուրդը, քանի որ բախում է տեղի ունենալու, անհամաձայնությունների շղթա»,- ասաց Վազգեն Մանուկյանը:

Նա նաև մեկնաբանեց երեկվա իշխանության հավաքը՝ նշելով, որ մեծ մասը եղել են բերված մարդիկ, կամ քաղաքացիական հագուստով ոստիկաններ, և զարմանալի է՝ երկրի վարչապետը հանրահավաք է անում, բայց այդքան քիչ մարդ է գալիս:
«Եթե նայենք երեկվա հավաքված մարդկանց, նախ այնտեղ շատ էին ոստիկանները, որոնք քաղաքացիական հագուստներով էին, մի քանի շուկայի և օլիգարխի աշխատողներ, որոնց բերել էին այդտեղ, այնտեղ էին մարդիկ, ում համար մեծ հաշվով ամեն բան մեկ է, ինչ ասում են, դա էլ անում են, ոչ մի էներգետիկա չկար դրա մեջ»,- ասաց նա:

Վազգեն Մանուկյանը նաև անդրադարձ կատարեց Ալիևի հայտարարությանը, որ հայկական կողմի բոլոր գերիները վերադարձված են:

«Ալիևը իր այդ հայտարարությամբ փորձում է քաղաքական հարցեր լուծել, և այդ հայտարարությունը նոր չէ, բայց նա գերիներին օգտագործում է իր պահանջները առաջ տանելու համար»,- ասաց Վազգեն Մանուկյանը: