«Ազգային համաձայնություն» կուսակցության ղեկավար Արամ Հարությունյանը վստահ է՝ Վազգեն Մանուկյանն իր՝ պաշտպանության նախարար եղած տարիներին լուրջ ներդրումներ է ունեցել բանակաշինության գործում և ամենակարևորը՝ նա ազգային-քաղաքական գործիչ է։

«Շատ կարևոր է, որ 17 կուսակցությունները կենտրոնացան հենց Վազգեն Մանուկյանի վրա, քանի որ նա նաև կոմպրոմիսային կերպար է։ Նա ընդունելի է բոլորի համար։ Իրեն, իհարկե, պիտի օգնեն և՛ երկրորդ նախագահը, և՛ երրորդ նախագահը, և՛ մյուս քաղաքական ուժերը։ Նա հետագայում ընտրություններում չի առաջադրվելու․ դա նաև երաշխիք է, որ Մանուկյանի առաքելությունն է՝ այս իրավիճակում Հայաստանը պատրաստել, տանել դեպի ընտրություններ։ Ես համոզված եմ՝ նա կհաջողի», — MegaNews.am-ի հեր զրույցում նշեց Արամ Հարությունյանը՝ շեշտելով՝ ինքը Վազգեն Մանուկյանին ճանաչում է դեռ ուսանողական տարիներից, գիտի, թե քաղաքականության մեջ ինչպիսի ճանապարհ է անցել։

Արամ Հարությունյանի խոսքով՝ երբ 17 քաղաքական ուժերի քննարկման ընթացքում հնչել է Վազգեն Մանուկյանի անունը, որևէ մեկը դեմ չի խոսել․ նա, իրոք կոմպրոմիսային կերպար է եղել։ Արամ Հարությունյանի պնդմամբ՝ այսօր մեր երկրում այնպիսի իրավիճակ է ստեղծվել, որ երկիրը ղեկավարելու առաքելությունը պիտի ստանձնեն բացառապես փորձառու, խոհեմ գործիչները։

Խոսելով Նիկոլ Փաշինյանի մասին՝ Արամ Հարությունյանը նշեց․ «Փաշինյանը ժողովրդին տարել է պարտության։ Նա այլևս անելիք չունի քաղաքականության մեջ։ Նրա համար մարդասիրական միջանցքը դեպի ԱԱԾ-ի նկուղն է կամ Ալիևի դռանը կապած մեդալակիր շուն լինելը։ Նա ուրիշ տարբերակ չունի։ Ես համոզված եմ՝ Փաշինյանը կընտրի առաջին տարբերակը՝ դրանով ապահովելով նաև իր ընտանիքի անվտանգությունը։ Նա չպիտի բանը հասցնի քաղաքացիական պատերազմին․ ես համոզված եմ՝ դա ոչ մի լավ բանի չի տանի», — նշեց Արամ Հարությունյանը՝ հիշելով՝ ժամանակին՝ Մարտի մեկին, Նիկոլ Փաշինյանը փախավ։ Եթե հարմար առիթ լինի, նա հիմա էլ է փախչելու՝ հարվածի տակ դնելով նաև այն մարդկանց, որոնք այս օրերին պաշտպանում են իրեն։

Մանրամասները՝ տեսանյութում