Նիկոլ Փաշինյանի հրաժարականը պահանջող «Հայրենիքի փրկության շարժման» հանրահավաքների մասնակից Հայկազ Հարությունյանը կարծում է՝ թեև զինվորականները չպետք է խառնվեն քաղաքական գործերին, բայց երբ քաղաքականությունը սկսում է հայրենիքի անվտանգությանը սպառնալ, բարձրաստիճան զինվորականները պարտավոր են միջամտել, պարտավոր են ցույց տալ, որ մեր քաղաքական ուղեգիծը սխալ է, և այն տանում է դեպի պարտություն․ մենք մեր հայրենիքն ենք կորցնում։

«ՀՀ ԶՈՒ ԳՇ-ն սկսել է դիրքորոշում հայտնել քաղաքական հարցերի վերաբերյալ, քանի որ Փաշինյանն իր ամեն քայլով խանգարում է պետականաշինության գործին, մեր հայրենիքի սահմանների անվտանգությանը։

Նա նաև ռազմավարական դաշնակցի հետ դաշնակցային հարաբերություններն է օրեցօր վատթարացնում։ Երբ թշնամի պետությունն է սկսում պաշտպանել քո երկրի վարչապետին, դա արդեն իսկ մտածելու տեղիք է տալիս, խորհելու, թե ուր է գնում մեր պետությունը, ո՛ր վեկտորն է վերցրել և ո՛ր ուղղությամբ է գնում՝ դեպի կործանո՞ւմ, թե՞ պետականաշինություն», — MegaNews.am-ի հետ զրույցում նշեց Հայկազ Հարությունյանը։ Նա ընդգծեց՝ հավատացած է, որ Նիկոլ Փաշինյանի հրաժարականի պահանջով հանրահավաքներին մասնակցելով՝ յուրաքանչյուր քաղաքացի կարող է իր ներկայությամբ ինչ-որ բան փոխել։

«Կարող ենք այդ կերպ ինչ-որ բան փոխել, ինչպես կարողացել ենք անել 1998-ին, 2018-ին, ինչպես կփոխենք շուտով՝ 2021-ին։ Ես վստահ եմ, որ մենք, այստեղ գտնվելով, կկարողանանք հասնել նրան, որ այսօր վարչապետի պաշտոնից կառչած անձն այդ աթոռից պոկվի՝ փողոցում տեսնելով նրանց, ովքեր իրեն բերեցին ու այդ աթոռին նստեցրին։ Այսօր մեր կողքին բազմաթիվ այդպիսի մարդիկ կան», — նշեց Հայկազ Հարությունյանը։

Նա շեշտեց՝ պայքարելու են այնքան ժամանակ, մինչև հանուն մեր պետականության՝ հնարավոր լինի հասնել նրան, որ վարչապետի լիազորությունները ստանձնի այդ պաշտոնին արժանի մարդ։

«Դա կլինի այս պայքարի շարունակությամբ, թե մեկ այլ պայքարով, չեմ կարող ասել։ Պայքարել եմ 2018-ին՝ հեռացնելով Սերժին, պայքարում եմ հիմա, որպեսզի հեռացնեմ Նիկոլին, կպայքարեմ նաև ապագայում, եթե հաջորդն էլ հայրենադավ գտնվի», - եզրափակեց Հայկազ Հարությունյանը։

Հասմիկ Բալեյան