Հայկական բանակի այս գործողությունները հեղաշրջում են անվանում միայն երկու հոգի՝ իրար հետ համագործակցված, մեկը Էրդողանն է, մյուսը՝ Նիկոլ Փաշինյանը։ Նրանք երկուսով են ասել, որ սա հեղաշրջման փորձ է։ Այս մասին «Հայրենիքի փրկության շարժման» հանրահավաքի ընթացքում ասել ՀՀ ՊՆ նախկին նախարար Սեյրան Օհանյանը։

Օհանյանը նշեց, որ բանակը մեր պաշտպանության, անվտանգության, տարածքային ամբողջականության երաշխավորն է։

«Ի՞նչ է՝ բանակը պետք է նայի տեսնի, թե ինչպես են մաս-մաս ադրբեջանցիներին ու թուրքերին հանձնում մեր հողերը։ Ո՛չ, բանակը ճիշտ է արել և վարչապետն իրավունք չունի բանակի հրամանատարությանը ոչ պաշտոնից ազատելու, ոչ էլ՝ հետապնդելու»,- նշեց նա՝ հավելելով, որ բանակը քաղաքական չեզոքություն է ցուցաբերել, չեն խառնվում հանրահավաքներին, իրենք իրենց տեսակետն են հայտնում՝ որպես ՀՀ քաղաքացի, ինչի իրավունքն ունեն։

Նրա խոսքով՝ 30 տարվա նորագույն պատմության մեջ բազմաթիվ արժեքներ են ձեռքբերել, պատմությունը կերտել ենք անկախության, ինքնիշխանության, Արցախի և հայկական բանակի շուրջը, պետականաշինությամբ ենք զբաղվել՝ իր բոլոր թևերով, բանակցային բավականին լուրջ ներուժ ենք ձեռք բերել։

«Ի վերջո՝ հայրենասիրական դաստիարակությամբ ենք զբաղվել և բանակ ձևավորել։ Ունեցել ենք նաև թերություններ։ Այս ապիկար իշխանությունները ոչնչացրեցին մեր բոլոր արժեքները, իսկ թերությունները բազմապատկեցին»,- ասաց Օհանյանը։