«Սա հերթական անգամ ապտակ է Հայաստանին։ Վստահ եմ, որ Ռուսաստանը ևս գիտի, որ՝ ի դեմս Փաշինյանի, գործ ունեն իր խոսքի արժեքը չիմացող երկրի ղեկավարի հետ»,- այս մասին «Փաստինֆո»-ի հետ զրույցում ասաց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը՝ անդրադառնալով Կրեմլի մեկնաբանությանը, Երևանից հնչող այն հայտարարություններին, թե Նիկոլ Փաշինյանը ՌԴ նախագահ Վլադիմիր Պուտինի հետ զրույցից հետո եկել է այն եզրակացության, որ «Իսկանդեր» համալիրների վերաբերյալ իրեն սխալ են զեկուցել։

Նաիրա Զոհրաբյանը չի զարմանում, որ Փաշինյանը ստիպված էր հերթական անգամ հերքել իր ասածները. «Ասում է մի բան, հետո փորձում է հաջորդ լայվով սվաղել նախորդ լայվով ասածը և այսպես շարունակ, անլուրջ է»։

Ըստ պատգամավորի՝ շատերը զվարճանում են «իսկանդեր շոուից», բայց ինքը ողբերգություն է համարում, երբ երկրի առաջին դեմքը բացարձակ չի տիրապետում վիճակին։

«Երբ որ երթուղայինի կամ տաքսու վարորդն այդպիսի հայտարարություն անի, կարող ես ասել, որ մարդը փորձում է հասկանալ, բայց չի տիրապետում, պարտավոր էլ չէ ամբողջապես տիրապետել ռազմական նրբություններին, բայց երբ որ երկրի գլխավոր հրամանատարն է ասում, սա խոսում է երկրի քաղաքական էլիտայի սնանկության մասին»։

Անդրադառնալով վարչապետի խոսնակի մեկնաբանությանը, թե առկա փաստերի և տվյալների համադրության արդյունքում եկել է եզրակացության, որ իրեն այս իրավիճակի առնչությամբ ճիշտ չի զեկուցվել, պատգամավորը վստահեցնում է, որ Փաշինյանը իսկանդերի մասին հայտարարությունն արել է գիտակցաբար՝ մեղքը գցելով ռազմական գերատեսչության վրա։

«Մարդիկ կան, որ իսկանդերի հետ կապված հայտարարությունը հերթական «բլթոցն» էին համարում. հազար անգամ ոչ։ Դա հստակ մտածված, հստակ արտաբերված արտահայտություն էր, որպեսզի արևմուտքին հստակ մեսսիջներ ուղարկի, որ ինքը կարող է Ռուսաստանի դեմ այդպիսի հայտարարություններ անել»։

Զոհրաբյանը հավելեց, որ Նիկոլ Փաշինյանը դեռևս Հայաստանում առաքելություն ունի և դա Հայաստանի գեոպոլիտիկ շրջադարձը դեպի արևմուտք ուղղելն է և Ռուսաստանից կտրվելը, իսկ դեպի արևմուտք շրջադարձ, նշանակում է Թուրքիայի և Ադրբեջանի ուղղակի ներկայություն Հայաստանում։

Այսօրվա հավաքներից պատգամավորը մի բան է ակնկալում՝ այնպես անել, որ բախումներ չլինեն։ Ըստ նրա՝ Նիկոլ Փաշինյանն ամեն ինչ անելու է, որ բախումներ լինեն, բայց ընդդիմադիրները դա թույլ չեն տա։ Զոհրաբյանը ևս տեղեկություններ ունի, որ խայտառակ վարչական ռեսուրսներ է կիրառվում, այսօր մարդկանց սպառնալով՝ բոլոր կառույցներից հրապարակ բերելու։ Զոհրաբյանն ասում է, եթե նրանք տարբերակ չունեն, թող գան հրապարակ, ապա միանան վարչապետի հրաժարականը պահանջողների ակցիային։

Աղբյուր` Փաստինֆո