Նիկոլ Փաշինյանի հրաժարականը պահանջող «Հայրենիքի փրկության շարժման» հանրահավաքի մասնակից քաղաքացիներից մեկը վստահ է՝ յուրաքանչյուր հայ այս օրերին պետք է գտնվի Բաղրամյան պողոտայում, քանի որ մեր երկիրը գտնվում է ճգնաժամային իրավիճակում, այս իշխանությունը մեր պետությունը դարձրել է պարտված երկիր։

«Այս պատերացմում մենք ցավագին պարտություն ենք կրել։ Կարծում եմ՝ դրա հետ կապված՝ որոշակի հարցերի պատասխաններ առաջիկայում կպարզվեն՝ չնայած մենք գիտենք՝ ինչ է կատարվել՝ կռվի դաշտում պայքարած գեներալներից սկսած, մինչև սովորական կռվող տղայի՝ չեն թողել պատերազմին մասնակից լինել։ Պատերազմի ընթացքում թույլ չտրվեց փորձառու, առաջին պատերազմի բովով անցած մարտիկներին պայքար մղել։ Նրանց դեմ էր խոսում (նկատի ունի վարչապետ Նիկոլ Փաշինյանին — հեղ․), քրեական գործեր էր հարուցում՝ թույլ չտալով, որ այդ գեներալներն ու մարտիկները հանուն հայրենիքի՝ իրենց անելիքն անեն», — նշեց մեր զրուցակիցը՝ ընգծելով՝ նույնիսկ այս օրերին՝ հետպատերազմյան ժամանակահատվածում, բանտարկվում է նա, ով պայքարում է թուրքական ու ադրբեջանական քարոզչամեքենայի դեմ․ Արա Սաղաթելյանի բանտարկության փաստը վկա է ասվածին։

«Այս մարդը (նկատի ունի վարչապետ Նիկոլ Փաշինյանին- հեղ․) կռվում է այն մարդկանց հետ, ովքեր թուրքի դեմ են կռվում», — ասաց մեր զրուցակիցը։ Նա ընդգծեց՝ կատարվող քաղաքական գործընթացների վերաբերյալ մասնագետները վերլուծություններ կներկայացնեն և կարծիքներ կհնչեցնեն, իսկ ինքը որպես քաղաքացի՝ հպարտ է, որ մեր ազգում կա միասնականություն, որ ժողովուրդը հավաքվել է Բաղրամյան պողոտայում՝ հայրենիքը փրկելու իր ներքին մղումով ու նվիրումով։ «Եվ մեկ անգամ ապացուցվեց ազգ-բանակ միասնականությունը։

Իրենք շատ վաղուց հասարակությունը բաժանել են սևերի ու սպիտակների, որի արդյունքը տեսաք՝ ինչ եղավ։ Այսօր ևս շարունակում են այդ բաժանումն անել, և թե ինչ հարցեր են ուզում լուծել, միայն իրենք գիտեն։ Իրենք կարողանում են միայն հայի դեմ պատերազմել, ոչ թե թուրքի։ Թուրքն ինչ ասում է, ոչ մի պատասխան չեն հնչեցնում», — ընդգծեց մեր զրուցակիցը։